Սիրիայում ալավիների իշխանությունից հեռանալն իսկույն Մերձավոր Արեւելքում կթուլացնի շիաների գոտին: Լրագրողներին այդ մասին այսօր` հուլիսի 23-ին, հայտնել է քաղաքագետ Հայկ Քոչարյանը: Ըստ նրա` դա կարող է թուլացնել եւ Իրանի, եւ Իրաքի շիական մեծամասնության դիրքերը:
«Իզուր չէ ակտիվացել Բահրեյնի շիական գործոնը: Սիրիական զգալի փոքրամասնություն է առկա նաեւ Սաուդյան Արաբիայում:
Նման խնդիրները լայն հնչեղություն չեն ստանում, բայց փորձագետները հետեւում են դրանց», – հավելել է Քոչարյանը:
Ըստ արաբագետ Սարո Սարոյանի` քաղաքական վարչակարգերի փոփոխությունը կարող է առանց բացասական հետեւանքների տեղի ունենալ միայն այն դեպքում, երբ հիմնված է լինում քաղաքական հավասարակշռության վրա: «Վերջին տասնամյակների ընթացքում մենք տեսնում ենք Մերձավոր Արեւելքում եւ Հյուսիսային Աֆրիկայում պետությունների տարանջատման միտում` Եթովպիա` Էրիթրեյա, Սուդան` Հարավային Սուդան, իսկ այսօր Իրաքի կազմում փաստացիորեն իր պետականությունն ունի իրաքյան Քրդստանը: Սակայն եթե դա հիմնված չէ քաղաքական հավասարակշռության վրա, ապա կարող է հանգեցնել անցանկալի հետեւանքների, ընդհուպ` հումանիտար աղետների», – նշել է Սարոյանը: