Ռուսաստանում հունվարի սկզբին սննդամթերքի նվազագույն արժեքը կազմել է ամսական 2609 ռուբլի (ինչը կազմում է օրական 87 ռուբլուց քիչ): Այս փաստը նշելով` «Բեռլինսկայա գազետա»-ն միաժամանակ մեկ այլ տեղեկություն է նշել` «Խնամքի տակ վերցրեք կենդանիներին» անունով Մոսկվայի կենդանաբանական այգու ծրագրի վերաբերյալ:
Տվյալ ծրագիրը քաղաքացիներին առաջարկում է մասնակցել ընտանի կենդանիների գոյատեւմանն աջակցելու բարեգործությանը, իսկ ավելի հստակ ֆինանսավորել նրանց գոյությունն ու սնումը: Որպեսզի քաղաքացիները հաշվեն հետագա ծախսերի համար իրենց նյութական հնարավորությունները, կենդանաբանական այգին ներկայացրել է տարբեր կենդանիների սննդի օրական արժեքը: Ոզնու սնունդը կազմում է օրական 84 ռուբլի, իսկ օրինակ ավանակի համար` օրական 87 ռուբլի 79 կոպեկ:
Վերլուծելով այս տվյալները` «Բեռլինսկայա գազետա»ն փաստում է, որ Ռուսաստանում մարդու սննդի արժեքի նվազագույնն ավելի բարձր է, քան ոզնունը, բայց ցածր է, քան ավանակինը:
Տեղեկության համար. Հայաստանում անցյալ տարվա չորրորդ եռամսյակում մեկ անձի համար սննդի արժեքի նվազագույնը կազմել է ամսական 22 հազար795,3 դրամ: Այս գումարը օրական կտրվածքով համարժեք է ռուսական մոտ 58 ռուբլու: Այսինքն ոզնին Ռուսաստանում ավելի շատ գումարի սնունդ է «խժռում», քան մարդը` Հայաստանում:
