նախընտրելի դարձնելԹեւոսիկի եղբոր՝ Արթուր Սաֆարյանի սպանության գործով կալանավորված Իսրայել Սարգսյանի խափանման միջոցը բողոքարկելու հարցը Վերաքննիչ դատարանը կքննի այսօր՝ փետրվարի 24-ին, ժամը 11.00-ին: Այս մասին NEWS.am-ի թղթակցի հետ զրույցում ասաց Իսրայել Սարգսյանի փաստաբանը՝ Գայանե Գալոյանը:
Նա նշեց, որ եթե Վերաքննիչ դատարանը մերժի իրենց բողոքը, ապա կդիմեն Վճռաբեկ դատարան եւ այդպես բոլոր դատական ատյաններում կբողոքարկեն: Մյուս միջնորդությունների մասին փաստաբանը կհայտնի Վերաքննիչ դատարանի որոշումից հետո: Գայանե Գալոյանը շեշտեց, որ արդեն 24-րդ օրն է՝ տեղեկություն չկա՝ որտեղ է Մոսոն կամ դիակը, բայց իր պաշտպանյալին մեղադրանք են առաջադրել սպանության հատկանիշներով:
«Իսրայելին 104-րդ հոդվածով մեղադրանք է առաջադրված առանց որեւէ հիմքերի եւ ապացույցների առկայությամբ: Ես համոզված եմ, որ Մովսես Ներսիսյանը կենդանի է, եթե դիակ չկա, անձը կենդանի է, այլ հարց է, եթե դիակը հայտնաբերվեր: Դրանից բացի՝ որեւէ ապացույց չկա, որը կփաստեր, որ Իսրայելը սպանել է Մովսեսին, չկա զենքը, իսկ արյան հետքերը ումը ասես կարող են լինել»,- նշեց Գայանե Գալոյանը:
Հիշեցնենք, որ հունվարի 27-ին, անհայտ անձը Արամի նրբանցքի շենքերից մեկի մուտքի մոտ կրակել եւ սպանել էր 41-ամյա Արթուր Սաֆարյանին (Նա հայտնի քրեական հեղինակություն «Թեւոսիկի» եղբայրն է-խմբ): Դեպքի առթիվ հարուցվել էր քրեական գործ՝ ՀՀ քր-օրի 104 հոդվածի 1-ին մասի (սպանություն) եւ 235 հոդվածի (ապօրինի զենք-զինամթերք կրելը, պահելը, օգտագործելը) հատկանիշներով:
Թեւոսիկի եղբոր՝ Արթուր Սաֆարյանի սպանության գործով ոստիկանության կողմից ձերբակալվել էր Իսրայել Սարգսյանը, ով Գոռ Վարդանյանի գլխավորած «Դուքենդո» ֆեդերացիայի անդամներից է: Ֆեդերացիայից առգրավվել էր մեծ քանակությամբ զինամթերք, ինչը պատճառաբանել են նկարահանվելիք ֆիլմերում օգտագործելու համար:
Քրեական գործով պարզվել էր, որ Իսրայել Սարգսյանն իր ընկեր Մովսես Ներսիսյանին պատվիրել է կատարել Արթուր Սաֆարյանի սպանությունը: Ըստ Ոստիկանության՝ եղել են օպերատիվ տվյալներ, որ սպանությունը, հնարավոր է, կատարած լինեն Իսրայել Սարգսյանը, Մովսես Ներսիսյանը եւ Տիգրան Ասատրյանը:
Ոստիկանները փետրվարի 3-ին բերման են ենթարկել Իսրայել Սարգսյանին եւ Տիգրան Ասատրյանին, Մովսես ներսիսյանին հայտնաբերել չի հաջողվում: Անձնական խուզարկությամբ Իսրայել Սարգսյանի մոտ հայտնաբերվել է «Բերետա» տիպի ատրճանակ:
Հետագայում Իսրայել Սարգսյանը, իր կատարած հանցագործությունը թաքցնելու նպատակով Մովսես Ներսիսյանին հրավիրել է Դավիթաշենի հյուրանոցներից մեկը, որտեղ սպանել է Մովսես Ներսիսյանին, ապա ավտոմեքենայով վերջինիս դին տեղափոխել է Քանաքեռավանի դաշտ եւ նետել կոյուղու դիտահորը: Փետրվարի 18-ից փրկարարները ոստիկանների հետ որոնում են Մովսեսի դին, սակայն առայժմ չի հաջողվել գտնել:
Խուզարկությամբ, Իսրայել Սարգսյանի բնակության վայրում հայտնաբերվել ու առգրավվել է ապօրինի զինամթերք: Տիգրան Ասատրյանի բնակության վայրից էլ հայտնաբերվել եւ առգրավվել են «Նագան» տիպի թմբուկավոր ատրճանակ եւ ռազմամթերք, մեծ քանակի ռազմամթերք է հայտնաբերվել նաեւ Մովսես Ներսիսյանի բնակության վայրում:
