Ներքաղաքական բախումների տեսանկյունից 2015թ. Վրաստանի համար, ամենայն հավանականությամբ, հետաքրքիր կլինի, NEWS.am-ի թղթակցի հետ զրույցում ասաց վրացի քաղաքագետ, Վրաստանի դիվանագիտական ակադեմիայի ռեկտոր Սոսո Ցինցաձեն:
Ըստ նրա՝ հարկավոր է հաշվի առնել, որ 2015թ. Վրաստանի համար նախընտրական է. «2016թ. Վրաստանում կկայանան խորհրդարանական ընտրություններ՝ «Վրացական երազանքի» իշխանության գալուց հետո առաջին անգամ: Տարին կանցնի ընտրություններին նախապատրաստվելով, իսկ ընտրությունների նախապատրաստման ֆոնին ինքնին հասկանալի է, որ կարելի է ներքաղաքական իրավիճակի սրացում սպասել՝ ընդդիմության եւ իշխող կոալիցիայի միջեւ», - ասաց Սոսո Ցինցաձեն:
Երեւում է, հավելել է նա, Վրաստանի պաշտպանության նախկին նախարար Իրակլի Ալասանիայի կուսակցությունն, այնուամենայնիվ, կկողմնորոշվի ընտրություններին առանձին կամ այլ կուսակցությունների հետ դաշինք կազմելով մասնակցելու հարցում:
Հիշեցնենք, 2014թ. նոյեմբերի 4-ին Վրաստանի վարչապետ Իրակլի Ղարիբաշվիլին հայտարարել էր պաշտպանության նախարար Իրակլի Ալասանիայի հեռացման մասին: Դա հանգեցրել էր իշխող կոալիցիայից վերջինիս ղեկավարած «Մեր Վրաստան՝ ազատ դեմոկրատներ» կուսակցության դուրս գալուն:
