Հայաստանի ոստիկանապետ Վլադիմիր Գասպարյանի հրամանով՝ Գյումրիում ընտանիքի 6 անդամներին դաժանորեն սպանելու դեպքի առթիվ ստեղծվել է օպերատիվ-հետախուզական խումբ: Այս մասին NEWS.am-ի թղթակցի հետ զրույցում ասաց Ոստիկանության տեղեկատվության եւ հասարակայնության հետ կապերի վարչության պետ Աշոտ Ահարոնյանը:

Խումբը ղեկավարում է ոստիկանապետի առաջին տեղակալ Հունան Պողոսյանը: Նրանք մեկնել են դեպքի վայր, նրանց հետ նաեւ գնացել են հատուկ ստորաբաժանումներ:

NEWS.am-ի տեղեկություններով՝ Գյումրիում հայտարարված է ուժեղացված հսկողություն, քանի որ ենթադրվում է, թե հանցագործը, որը ռուս զինվորական է, զինված է:

NEWS.am-ի թղթակիցը Գյումրիից հաղորդում է որ ուժեղացված հսկողություն է սահմանվել քաղաքի դպրոցների, սպասարկման օբյեկտների մոտ, բնակիչներին հորդորում են փողոց դուրս չգալ: Մեր տեղեկություններով, հրահանգվել է փակել Գյումրիից դուրս եկող բոլոր ճանապարհները:

Դեպքի վայրում են Հայաստանում ռուսական 102-րդ ռազմակայանի հրամանատար Անդրեյ Ռուզինսկին, ՊՆ եւ ռազմական ոստիկանության ներկայացուցիչներ:

Ավելի վաղ NEWS.am-ը գրել էր, որ ողբերգություն է տեղի ունեցել Գյումրիում: Մյասնիկյան փողոցի տներից մեկում ընտանիքի անդամներին գտել էին սպանված: Նրանց վրա հրազենային վնասվածքներ են եղել: -Սպանվածներից հինգը չափահաս են եղել, մեկը՝ մանկահասակ երեխա: Այս տեղեկությունը հաստատել էին ոստիկանությունից՝ առանց մանրամասներ հայտնելու: Այս պահին դեպքի վայրում իրավապահներ են աշխատում: