Հայ ազգային կոնգրեսը փորձում է շոյել հասարակության ականջը գազի սակագինը նվազեցնելու անհրաժեշտության մասին հայտարարություններով: Այդ մասին այսօր՝ ապրիլի 10-ին, ԱԺ-ում կայացած ավանդական ճեպազրույցների ժամանակ հայտարարեց Հանրապետական խմբակցության ղեկավար Վահրամ Բաղդասարյանը:
ՀԱԿ խորհրդարանական խմբակցության քարտուղար Արամ Մանուկյանի հայտարարությանը, որ բնակչության համար գազի սակագինը կարելի է նվազեցնել 25%-ով, Բաղդասարյանը պատասխանեց. «Այդպես կարելի է նվազեցնել եւ 30%-ով, եւ 40%-ով: Ո՞վ դա չի ցանկանա: Նման հայտարարությունները հաճելի է լսել: Սակայն պետք է իրատես լինել: Գազի գնագոյացման հարցերով խորհրդարանական ժամանակավոր հանձնաժողովը շատ մեծ աշխատանք է կատարել եւ մի շարք արժեքավոր առաջարկություններ ներկայացրել: Եվ ամենակարեւորը. դրանք հիմնված են փաստերի, այլ ոչ թե բարի ցանկությունների վրա», - ասաց Բաղդասարյանը: