Հայաստանը պատրաստ չէ Թուրքիայի հետ որեւէ նախապայմանով հարաբերություններ հաստատել: Այս մասին Հայաստանի նախագահ Սերժ Սարգսյանի հայտարարել է Reuters գործակալությանը տված հարցազրույցում:
«Մենք պետք է ի վերջո հարաբերություններ հաստատենք, եւ այդ հարաբերությունների հաստատումը պետք է լինի առանց նախապայմանների։ Մենք որեւէ նախապայման թուրքերին չենք առաջադրում։ Մենք չենք ասում՝ դուք ճանաչեք ցեղասպանությունը, հարաբերություններ հաստատենք։ Կարծում եմ՝ մեր մոտեցումը արդարացի մոտեցում է, կառուցողական մոտեցում է։ Իսկ Թուրքիայի ղեկավարությունը մշտապես ինչ-որ նախապայմաններ է փորձում առաջադրել։ Մենք որեւէ նախապայմանով պատրաստ չենք հարաբերություններ հաստատել։ Սա է ամբողջ խնդիրը․ Երբ թուրքերը պատրաստ կլինեն առանց նախապայմանների հարաբերություններ հաստատել, վստահ եմ, որ գործը առաջ կգնա»,- հայտարարել է Սարգսյանը:
Հարցին, ի՞նչ է մտածում հայ-թուրքական արձանագրությունների ճակատագրի մասին, Հայաստանի նախագահը պատասխանել է. «Իմաստ չունի: Ի՞նչ իմաստ ունի տասնամյակներով պահել մի փաստաթուղթ, որը ապացույց է այն բանի, որ պետություններից մեկը հրաժարվում է իր իսկ բանակցած փաստաթղթի դրույթներն իրականացնելուց։ Դա մեզ համար ցանկալի երեւույթ է, նկատի ունեմ արձանագրությունների վավերացումը, բայց մեր մեղքը չէ, որ այդ արձանագրությունները մնում են օդում կախված»։
Իսկ հարցին, թե ինչ է մտածում ԱՄՆ նախագահ Բարաք Օբամայի նախագահի դիրքորոշման առնչությամբ, նախագահը պատասխանել է. «Իհարկե, մենք կցանկանայինք, որ այսօր իր ուղերձում պարոն Օբաման ասեր «ցեղասպանություն» բառը: Եթե չի ասել կամ չի ասելու, դրա պատճառը մմիայն ու միայն մեկն է, ոչ թե Միացյալ Նահանգները չեն ճանաչում Ցեղասպանությունը, այլ չեն ցանկանում այսր արտաբերել այդ բառը, որպեսզի իրենց դաշնակից Թուրքիան, իբր թե, չվիրավորվի»:
Հիշեցնենք, որ նախօրեին ամերիկահայ համայնքի ներկայացուցիչների հետ հանդիպման ժամանակ Սպիտակ տան աշխատակազմը հաղորդել էր, որ ապրիլի 24-ի ուղերձում նախագահ Օբաման չի արտասանելու «ցեղասպանություն» բառը:
