Հայաստանը շարունակում է մնալ ԱՄՆ օրակարգում ԱՄՆ հայկական համայնքի պատճառով։ Այս մասին ինտերնետ մամուլի ասուլիսի ժամանակ հայտարարել է ԱՄՆ Ատլանտյան խորհրդի աշխատակից Սաբինա Ֆրեյզերը՝ պատասխանելով NEWS.am-ի թղթակցի այն հարցին, թե ինչ դեր եւ նպատակներ ունի ԱՄՆ-ն Հարավային Կովկասում, հատկապես՝ Հայաստանում, եւ փոխվել է արդյոք այդ դերը Հայաստանի՝ ԵՏՄ-ին անդամակցելուց հետո։

Նրա խոսքով՝ ԱՄՆ-ը Հարավային Կովկասում ուժեղ ազդեցության մեթոդ չի կիրառում։ «ԱՄՆ-ը հիմնականում հետաքրքրված է այդ տարածաշրջանով՝ որպես  Եվրամիություն էներգետիկ պաշարներ տեղափոխելու տարանցիկ կետ դեպի Կենտրոկանա Ասիա՝ Աֆղանստան, ինչպես նաեւ թրաֆիքինգի վերահսկողության առումով»,- նշեց Ֆրեյզերը։

Հարավային Կովկասում ԱՄՆ-ն չի իրականացում ԵՄ «Արեւելյան գործընկերության» ծրագրի քաղաքականությունը։ «ԵՄ քաղաքականության մշակողների հիասթափությունը առաջ բերեց հատկապես ԵՄ-ի հետ ասոցացման համաձայնագրի ստորագրումից հրաժարվելու եւ դրա փոխարեն ԵՏՄ անդամ դառնալու Հայաստանի որոշումը։

Ակնհայտ է, որ այդ որոշումը կայացվել էր մի գիշերում։ Իհարկե, Հայաստանը պետք է հաշվի առնի Ռուսաստանի շահերը, սակայն Ասոցացման համաձայնագրի ստորագրման նախօրեին ուղղության հանկարծակի փոփոխությունը թուլացրեց Հայաստանի դիրքերը՝ որպես հուսալի բանակցողի»,- կարծիք է հայտնել Սաբինա Ֆրեյզերը։

Հիշեցնենք, որ հունվարի 2-ից Հայաստանը դարձել է ԵՏՄ լիիրավ անդամ։