Հայաստանի դիվանագիտական դպրոցը Եվրամիությունից լրացուցիչ ֆինանսավորում կստանա մինչեւ 2017թ. ապրիլը։ Այս մասին մայիսի 11-ին կայացած «Էլեկտրոնային դիվանագիտություն. հեռանկարներ եւ մարտահրավերներ» թեմայով միջազգային գիտական կոնֆերանսի ժամանակ հայտարարեց Հայաստանում ԵՄ պատվիրակության ղեկավար, դեսպան Տրայան Հրիսթեան։
Նշենք, որ կոնֆերանսը իր 5-ամյակի կապակցությամբ կազմակերպել է Հայաստանի դիվանագիտական դպրոցը։
«Մենք ուրախ ենք, որ Հայաստանի դիվանագիտական դպրոցը իր 5-ամյակը նշում է միջազգային կոնֆերանս կազմակերպելով եւ Եվրամիության անդամ երկրների դիվանագիտական դպրոցների եւ ծառայությունների հետ կապեր հաստատելով»,- նշեց Հրիսթեան։
Նրա խոսքով՝ ԵՄ-ի եւ Երեւանի համագործակցության երկարաժամկետ նպատակը Հայաստանի դիվանագիտական դպրոցին աջակցելն է՝ վերջինիս կառուցվածքը ուժեղացնելու եւ դիվանագիտական անձնակազմը վերապատրաստելու ու կրթելու նպատակով։
Հրիսթեան հայտարարեց, որ ԵՄ-ն հետեւողական կլինի Հայաստանի դիվանագիտական դպրոցի ինստիտուցիոնալ զարգացման գործում օգնություն ցուցաբերելու հարցում։
Հայաստանում ԵՄ պատվիրակության ղեկավարը հիշեցրեց, որ ծրագիրը մեկնարկել է 2013թ. որպես պետական կառավարման մարմինների համակարգային զարգացման ծրագրի մի մաս։ Նշենք, որ ծրագրի ընդհանուր արժեքը կազմում է 1 660 000 եվրո։
