Աբովյանի քաղաքապետի ընտրություններին Ծառուկյանի թեկնածուին պարտված Արթուր Հարությունյանը՝ Պալաչը դատի է տվել Գագիկ Ծառուկյանին: NEWS.am-ը դատական տեղեկատվական համակարգից տեղեկացավ, որ Արթուր Հարությունյանի «Կինգ Դելյուքս» ընկերությունը դիմել է Կենտրոն եւ Նորք-Մարաշ վարչական շրջանների ընդհանուր իրավասության դատարան՝ ընդդեմ «Գագիկ Ծառուկյան» հիմնադրամի՝ պահանջելով արգելել բարեգործական ուղեւորափոխադրումները: Նիստը նշանակված է օգոստոսի 3-ին, ժամը 11.00-ին:
«Կինգ Դելյուքս» ՍՊԸ-ի շահերը դատարանում ներկայացնում են փաստաբաններ Ալեքսանդր Սիրունյանը եւ Կարեն Կիրակոսյանը: Փաստաբան Ալեքսանդր Սիրունյանը NEWS.am-ի թղթակցի հետ զրույցում հաստատեց, որ նման հայց է ներկայացվել դատարան, սակայն առավել մանրամասն տեղեկատվություն խոստացավ տրամադրել «Գագիկ Ծառուկյան» հիմնադրամի կողմից հայցի պատասխանը ստանալուց հետո:
Նկատենք, որ երկու փոխադրողների դատական վեճը քննելու է Տրանսպորտի եւ կապի նախարարի Գ.Բեգլարյանի խնամի դատավոր Գագիկ Խանդանյանը:
Նշենք, որ «Գագիկ Ծառուկյան» բարեգործական հիմնադրամը անվճար երթուղիներ ունի Երեւան-Աբովյան, Երեւան-Չարենցավան ուղղություններում, որոնք խանգարում էին «Կինգ դելյուքսի» աշխատանքներին, քանի որ բնակիչները նախընտրում էին անվճար երթուղայից օգտվել, իսկ իրենց վարորդները ուղեւորներ էին ունենում: Արթուր Հարությունյանը հայտարարել էր, թե դա բարեգործություն չէ, այլ չարագործություն: Այդ «հողի» վրա նա հակասություններ ուներ Ծառուկյանի հետ, որոնք հետագայում ավելի սրվեցին: Աբովյանի քաղաքապետի ընտրություններում Արթուր Հարությունյանը առաջադրվեց, սակայն ՀՀԿ-ն նրան «չներեց» դրա համար, ոչ միայն հեռացրեց իր շարքերից, այլեւ սատարեց Ծառուկյանի օգնականին՝ Վահագն Գեւորգյանին: Վերջինս էլ դարձավ Աբովյանի քաղաքապետ: Արթուր Հարությունյանը բազմիցս հայտարարել էր, թե իր մրցակիցը ոչ թե Վահագն Գեւորգյանն է, այլ Ծառուկյան Գագոն: