Ոստիկանությունը պատրաստվում է Բաղրամյան պողոտայում ցուցարարներից առգրավել աղբամանները:
Ոստիկանության գնդապետ Արսեն Այվազյանը դիմել է ցուցարարներին եւ նշել. «Կենտրոն եւ Նորք Մարաշ քննչական բաժնում քրեական օրենսգրքի 185 հոդվածով հարուցվել է քրեական գործ (ֆոտոռեպորտաժ)։ Որոշվում է կայացվել առգրավել «Սանիտեք» կազմակերպությանը պատկանող տվյալ պահին Բաղրամյան պողոտայում գտնվող աղբամանները։ Քրական գործով մեղադրյալներ կամ կասկածյալներ չկան։ Քրեական գործը հարուցվել է «Սանիտեք»-ի հայցի հիման վրա, գույքը դիտավորյալ վնասելու հատկանիշներով»։ Նա կոչ արեց չխոչընդոտել քննչական գործողություններին։
Այս որոշումը բուռն հակազդեցություն առաջացրեց ցուցարարների շրջանում: Ակտիվիստները սկսեցին վանկարկել. «ոչ, ոչ»։
Այստեղ է նաեւ Երեւանի ոստիկանապետ Աշոտ Կարապետյանը։
Հունիսի 23-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը: Հունիսի 28-ին ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում։ Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: