Դերասանուհի Անի Երանյանը այսօր՝ հուլիսի 18-ին, իր վարած «Հունդայի» մակնիշի մեքենայով վթարի է ենթարկվել Գեղարքունիքի մարզի Ճամբարակից դեպի Սեւանի մայրուղի տանող ճանապարհին: Դերասանուհին վնասվածքներով տեղափոխվել է Սեւանի բժշկական կենտրոն:
Բժշկական կենտրոնի տնօրեն Վարուժան Մանուկյանը NEWS.amի հետ զրույցում հաստատեց այս տեղեկությունը՝ նշելով, որ Անի Երանյանի մոտ առկա են եղել վնասվածքներ՝ ձախ այտի ստորին կոպի եւ ականջի հետեւի շրջանում:
«Պատռվածքների վրա կար է դրվել: Հետազոտվել է, ներքին արնահոսություն, կամ կոտրվածք չի հայտնաբերվել: Իր ցանկությամբ այսօր պետք է տեղափոխվի Երեւանի հիվանդանոցներից մեկը»,-ասաց Վարուժան Մանուկյանը:
Հիվանդանոցի տնօրենի խոսքով՝ ավտովթարի հետեւանքով տուժել է նաեւ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատավոր Գագիկ Պողոսյանը, որը նույնպես տեղափոխվել է հիվանդանոց, սակայն նրա մոտ որեւէ լուրջ վնասվածք նրա մոտ չի հայտնաբերվել, հետազոտվելուց հետո դատավորը հեռացել է:
Դեպքը տեղի է ունեցել երեկոյան 18:30-ի շրջանում: Մանրամասները կհաղորդենք ավելի ուշ:
