Հայաստան-Իրան երկաթգծի կառուցման արժեքը կազմում է շուրջ 1,7-2 մլրդ դոլար։ Այս մասին օգոստոսի 20-ին լրագրողների հետ հանդիպան ժամանակ հայտարարեց Հայաստանի կապի եւ տրանսպորտի նախարար Մանուկ Վարդանյանը։ Հանդիպմանը ներկա ռուս գործընկեր Իգոր Լեվիտինը, ով Ռուսաստանի նախագահ Դմիտրի Մեդվեդեւի Հայաստան կատարած պետական այցի շրջանակներում գտնվում է Երեւանում, իր հերթին նշեց, որ երկաթգծի ծրագիրը համակարգում է Հայաստանի, Իրանի եւ Ռուսաստանի կապի փոխնախարարներից կազմված աշխատանքային խումբը։
«Ներկայումս մեզ մոտ առկա է միայն տեխնիկական զեկույց, որը կազմել է «ՏրանսՆախագիծ» ինստիտուտը արտասահմանյան մի ընկերության հետ համատեղ։ Այդ զեկույցում նախագծի արժեքը գնահատվում է 1,7-2 մլրդ դոլար»,-նշեց Վարդանյանը՝ հավելելով, որ դեռ պարզ չէ, թե որքանո՞վ են իրական այդ թվերը։
«Դա պարզ կլինի միայն տեխինկա-տնտեսական հիմնավորումը կազմելուց հետո»-ասաց նա։
Հայաստանի տրանսպորտի եւ կապի նախարարը նաեւ հայտարարեց, որ վերջերս Ռուսաստանի երկաթգծի նախագահ Վլադիմիր Յակունինի Հայաստան կատարած այցելության ժամանակ քննարկվել են Վանաձոր-Ֆիալետովո երկաթուղային գծի ծրագրման հարցերը։ Դրանով ավարտվելու է երկաթգիծը Հայաստանի հյուսիսում։
«Ներկայումս ավարտվում է տեխնիկական փուլը, շուտով այն կփաստաթղթավորվի եւ մենք կշարունակենք աշխատանքը հաջորդ փուլում»,-հայատարարեց Վարդանյանը։
Երկաթգիծը կկառուցվի 5 տարում։ Նախնական հաշվարկներով, Իրան-Հայաստան երկաթգծի երկարությունը 470 կմ է, որից 60 կմ-ը կլինի Իրանի տարածքում, իսկ 410 կմ Հայաստանի հատվածում։ Ծրագիրը կիրականացվի 3 փուլով։ Ըստ նախնական պայմանավորվածության՝ Իրանը Հայաստանի համար ելք կապահովի դեպի Պարսից ծոց։
Անցած տարի Հայաստանն ու Ռուսաստանը պայմանավորվածություն են ձեռք բերել, որով Իրան-Հայաստան երկաթգծի կառուցմանը կմասնակցեն նաեւ «Ռուսական երկաթգծի», «Ռոսժելդոպրոեկտի» «Զարուբեժստրոյտեխնոլգիա» ընկերությունների երկու քույր ընկերություններ։
