Հայ եւ ռուս փորձագետների կարծիքները Նախիջեւանում թուրքական ռազմակայանի տեղակայման հնարավորության մասին չհամընկան:
Հայ եւ ռուս փորձագետների մասնակցությամբ հեռուստակամուրջի ընթացքում Կովկասի ինստիտուտի քաղաքական բաժնի ղեկավար Սերգեյ Մինասյանը հայտարարել է, որ այդ ճանապարհին Թուրքիայի առջեւ շատ խոչընդոտներ կան: «Թուրքական զինվորականների տեղակայմանը առաջին հերթին կխանգարի ՆԱՏՕ-ի անդամակցությունը: Երկրորդ, կա բացասական դիրքորոշում երկու հիմնական տարածաշրջանային խաղացողների՝ Իրանի եւ Ռուսաստանի կողմից: Բացի այդ, Անկարան իրականում շահագրգռված չէ նման հեռանկարով, քանի որ դա հավելյալ գլխացավանք է լինելու: Ինչո՞ւ Թուրքիան մտնի նոր հակամարտությունների մեջ»,- նկատել է փորձագետը: Նա նաեւ ընդգծել է, թե Թուրքիան չի կարող տեղակայել իր զորակազմը Ադրբեջանում, քանի դեռ չի կարգավորել հարաբերությունները Հայաստանի հետ:
Ռազմավարական մշակույթի հիմնադրամի փոխտնօրեն Անդրեյ Արեշեւն, ի հակակշռի իր հայ գորընկերոջ, հայտարարել է, թե այն, որ Թուրքիան արդեն երկար ժամանակ հավելյալ հետաքրքրություն է ցուցաբերում Նախիջեւանի ինքնավարության նկատմամբ, որեւէ մեկի համար գաղտնիք չէ: Նա նշել է, որ Թուրքիան կարող է ռազմակայան տեղակայել Ադրբեջանում, այն էլ առանց համապատասխան պայմանագրի:
Նշենք, որ Նախիջեւանում թուրքական զորակազմի տեղակայման մասին լուրերը սկսեցին շրջանառվել Թուրքիայի նախագահ Աբդուլլահ Գյուլի՝ Ադրբեջան կատարած այցից հետո:
