ProCredit Bank-ի ձեռքբերումն «Ինեկոբանկի» կողմից վերջինիս թույլ կտա ներգրավել ավելի էժան միջազգային գումարներ եւ, համապատասխանաբար, ավելի մատչելի վարկեր տրամադրել: Այդ մասին դեկտեմբերի 10-ին ասաց Վերակառուցման եւ Զարգացման Եվրոպական Բանկի (EBRD) Հայաստանի մենեջեր Մարկ Դեյվիսը՝ հանդես գալով միաձուլման գործարքին նվիրված մամուլի ասուլիսին:
Հիշեցնենք, այսօր «Ինեկոբանկը» հայտարարեց ProCredit Bank-ի բաժնետոմսերի 100%-ի ձեռքբերման մասին: Գործարքի համար բանկը ներգրավեց Միջազգային Ֆինանսական Կազմակերպության (IFC) վարկ՝ $20 մլն-ի չափով, ինչպես նաեւ Վերակառուցման եւ Զարգացման Եվրոպական Բանկի (EBRD) բաժնետիրական ներդրում՝ 9,8 մլրդ դրամի չափով (ներկայիս փոխարժեքով՝ շուրջ $20,2 մլն - խմբ)՝ ստանալով արժեթղթերի 22,7%-ը:
Այս կարեւոր գործարքը սկիզբ է դնում Հայաստանի բանկային համակարգի կոնսոլիդացիային, ինչը պետական քաղաքականության առաջնահերթություններից է: Տարածաշրջանի այլ երկրների համեմատ, հայաստանյան բանկերի ծախսերի հարաբերակցությունը ակտիվներին փոքր-ինչ բարձր է: Կրճատելով վարչական ծախսերը միաձուլմամբ՝ հնարավոր է ավելացնել էֆեկտիվությունը, իսկ ավելի խոշոր բանկերն ունակ են ավելի լավ կլանել տնտեսական ռիսկերը: Սա հատկապես կարեւոր է այսօրվա տնտեսական անորոշության համատեքստում, հավելեց EBRD-ի Հայաստանի ղեկավարը:
«Ինեկոբանկն» ուժեղ բանկ է, համեմատաբար բարձր տենոլոգիայիով: Իբրեւ գործընկեր՝ մենք կարող ենք այդ հիմքի վրա ստեղծել ավելի առաջադեմ ֆինանսական գործիքներ», - ասաց Դեյվիսը:
Վերջապես, ավելի խոշոր բանկերը կարող են լավագույնս դրսեւորվել կապիտալի շուկայում: «Ինեկոբանկը» շարժվում է այդ ուղիով եւ հնարավորություն ստանում լավ պայմաններով գումարներ ներգրավել ոչ միայն տեղական, այլեւ միջազգային շուկաներից: Այս գործընթացը շատ կարեւոր է երկրի ողջ ֆինանսական համակարգի համար, եզրափակեց նա: