2014-ի տարեվերջի փոխարժեքի տատանումից հետո վարկերի վերադարձը համեմատաբար կայունացել է: Այդ մասին NEWS.am-ի հետ զրույցում նշել է «Ինեկոբանկի» գործադիր տնօրեն Տարոն Գանջալյանը:
Նշենք, որ ըստ ՀՀ Կենտրոնական բանկի վիճակագրության, եթե 2014 թ դեկտեմբերին չաշխատող ակտիվների տեսակարար կշիռը բանկային համակարգում եղել է 6,15%, ապա 2015 թ հունիսին այն կազմել է 8,23%, սակայն հետագայում նվազել է՝ հոկտեմբերին կազմելով 7,20%:
«Ինեկոբանկի» մոտ այս միտումները քիչ թե շատ նույնն էին: Խնդիրների ալիքը եկել էր դեկտեմբերի իրավիճակից հետո եւ տեւել մինչ փետրվար: Այս տարի իրավիճակը համեմատաբար կայունացել է, նշեց Գանջալյանը;
«Մենք շատ զգույշ ենք հետեւում, թե որ հաճախորդներին ինչ արժույթով են տրամադրվում վարկերը: Արտարժութային վարկերը հիմնականում տրվում են ձենարկություններին, որոնք իրենց գործունեությամբ ի վիճակի են տանել հնարավոր սթրեսները: Այժմ, կարելի է ասել, իրավիճակը վերահսկելի է, սթրեսները՝ կառավարելի», - նշեց նա:
Հիշեցնենք, դեկտեմբերի 10-ին «Ինեկոբանկը» հայտարարեց ProCredit Bank-ի բաժնետոմսերի 100%-ի ձեռքբերման մասին: Գործարքի համար բանկը ներգրավեց Միջազգային Ֆինանսական Կազմակերպության (IFC) վարկ՝ $20 մլն-ի չափով, ինչպես նաեւ Վերակառուցման եւ Զարգացման Եվրոպական Բանկի (EBRD) բաժնետիրական ներդրում՝ 9,8 մլրդ դրամի չափով (ներկայիս փոխարժեքով՝ շուրջ $20,2 մլն - խմբ)՝ ստանալով արժեթղթերի 22,7%-ը: