2016 թ «Ինեկոբանկը» նախատեսում է ընդլայնել սպառողական վարկավորումը: Այդ մասին NEWS.am-ի հետ զրույցում նշել է «Ինեկոբանկի» գործադիր տնօրեն Տարոն Գանջալյանը:
Ֆիզիկական անձանց վարկավորումը բանկի մոտ ավանդաբար զարգացած էր, իսկ ՓՄՁ վարկերի պորտֆելը զգալիորեն կավելանա ProCredit Bank-ի ձեռքբերման արդյունքում: Եթե այժմ ՓՄՁ-անհատներ վարկային պորտֆելների հարաբերակցությունը բանկում կազմում է մոտ 55-45%, ապա գործարքից հետո այն կկազմի մոտ 70-30%:
«Այդ պատճառով մյուս տարվա պլաններում մենք աճ ենք նախատեսում ֆիզիկական անձանց ուղղությամբ, որպեսզի կշիռները պահպանենք նախորդ մակարդակին: Ընդ որում, հիմնականում նախատեսում ենք դրամային վարկեր: Մեր քաղաքականությունն է, եւ, կարելի է ասել, մեր փափագը, որ Հայաստանում ազգային արժույթով վարկերը հնարավորինս ավելանան», - հավելեց նա:
Հիշեցնենք, դեկտեմբերի 10-ին «Ինեկոբանկը» հայտարարեց ProCredit Bank-ի բաժնետոմսերի 100%-ի ձեռքբերման մասին: Գործարքի համար բանկը ներգրավեց Միջազգային Ֆինանսական Կազմակերպության (IFC) վարկ՝ $20 մլն-ի չափով, ինչպես նաեւ Վերակառուցման եւ Զարգացման Եվրոպական Բանկի (EBRD) բաժնետիրական ներդրում՝ 9,8 մլրդ դրամի չափով (ներկայիս փոխարժեքով՝ շուրջ $20,2 մլն - խմբ)՝ ստանալով արժեթղթերի 22,7%-ը: