«Ինեկոբանկն» արդեն օգտվում է ՀՀ Կենտրոնական Բանկի նախատեսված զրոյական պահուստավորմամբ միջոցների ներգրավումից: Այդ մասին NEWS.am-ի հետ զրույցում նշել է «Ինեկոբանկի» գործադիր տնօրեն Տարոն Գանջալյանը:

Հիշեցնենք, ըստ ԿԲ իրավական ակտերի, ներգրավված գումարների պարտադիր 20 տոկոս պահուստավորման պահանջն ամբողջությամբ հանված է, եթե միջոցները ներգրավվում են վստահելի միջազգային հարթակներից, եւ իջեցված է մինչեւ 5 տոկոս, եթե դրանք տեղաբաշխվում են հայաստանյան Nasdaq OMX ֆոնդային բորսայում:

«Մենք արդեն իսկ միջոցներ ենք ներգրավել այս որոշման չափանիշներին համապատասխանող արտասահմանյան կազմակերպություններից եւ օգտագործում ենք դրանք: Ինչ վերաբերում է արժեթղթերի թողարկմանը, ապա որոշակի վերլուծություն արդեն կատարել ենք, իսկ այժմ պիտի գնահատենք թողարկման նպատակահարմարությունը», - նշեց նա: 

Հարցին, թե արդյոք բանկը մտադիր է արժեթղթավորել հիփոթեքային ակտիվները, երբ Կենտրոնական Բանկի ներկայացրած համապատասխան օրինագիծն ուժի կմեջ մտնի, Գանջալյանը նշեց, որ հիփոթեքը բանկի համար առաջնային շուկա է:

«Միեւնույն ժամանակ, շուկայում պետք է մրցունակ առաջարկներ անել, իսկ դրա համար մեծ ջանքեր են պետք՝ հաշվի առնելով, որ դեպոզիտային տոկոսադրույքները Հայաստանում 16-17 տոկոս են, իսկ հիփոթեքայինները՝ 11-12 տոկոս», - հավելեց նա:

Բոլոր դեպքերում, բանկի համար ավելի նախընտրելի է տեղական Nasdaq OMX բորսան, քանի որ այնտեղ տոկոսադրույքը ավելի գրավիչ է, քան  արտերկրի բորսաներում: