ՎԶԵԲ-ը պատրաստ է աջակցել տեղական բանկերին՝ տեղական արժեթղթեր ձեռք բերելու: Այդ մասին NEWS.am-ի հետ զրույցում ասաց ՎԶԵԲ-ի Երեւանյան գրասենյակի ղեկավար Մարկ Դեյվիսը՝ «Ինեկոբանկի» կողմից ProCredit Bank-ի ձեռքբերմանը նվիրված միջոցառմանը:
Հարցին, թե ինչ սպասումներ ունի ՎԶԵԲ-ը ՀՀ Կենտրոնական Բանկի կազմած օրինագծի մասին, որը հնարավոր է դարձնում թողարկել հիփոթեքային ապահովմամբ արժեթղթեր, Դեյվիսը նշեց, որ նման գործիքները միանգամայն տեղին են:
Արժեթղթերի պահանջարկը կտրուկ ընկել էր ֆինանսական ճգնաժամի սկսվելուն պես, սակայն վերջին մեկ-երկու տարվա ընթացքում աստիճանաբար վերականգնվում է: Այս գործիքը կարող է շատ օգտակար լինել, եթե պատշաճ կերպով կարգավորվի եւ տեղաբաշխվի, ասաց նա:
«Մենք շատ ուրախ ենք այս հնարավորության առթիվ եւ պատրաստ ենք հեռանկարում ֆինանսավորել բանկերին՝ գնելու տեղական բորսայում թողարկված արժեթղթեր», - ասաց նա:
Հարցին՝ արդյոք տեղական շուկայում կան բավարար չափի հուսալի հիփոթեքային վարկերի պորտֆել, որի ապահովմամբ հնարավոր է արժեթղթեր թողարկել ՎԶԵԲ-ի ներկայացուցիչը պատասխանեց. «Միանշանակ: Անշարժ գույքի շուկայում այն դեռ մեծ տեղ չի գրավում, սակայն կարող է բավարար չափերի հասնել»:
