IFC-ի եւ EBRD-ի հետ համաձայնագրերն «Ամերիաբանկ»-ին աննախադեպ աճի հնարավորություն են տալիս: Հունվարի 21-ին Երեւանում Վերակառուցման եւ զարգացման եվրոպական բանկի (EBRD) եւ Միջազգային ֆինանսական կորպորացիայի (IFC) հետ ֆինանսական համաձայնագրերի կնքումից հետո այս մասին հայտարարեց «Ամերիաբանկ»-ի տնօրենների խորհրդի նախագահ Անդրեյ Մկրտչյանը:
Նրա խոսքով, այս գործարքների կնքումը թույլ տվեց գրեթե երկու անգամ ավելացնել նորմատիվ կապիտալը եւ նոր հնարավորություններ ստեղծեց վարկավորման աճի համար:
2008 թվականից բանկը շուրջ 500 մլն դոլարի միջոցներ է ներգրավել միջազգային ֆինանսական կազմակերպություններից:
«2008 թվականին «Ամերիա» խումբը ոչ մեծ բանկ ձեռք բերեց՝ ընդամենը 11 մլն դոլարի կապիտալով եւ 25 մլն դոլարի ակտիվներով: Իսկ այսօր մենք Հայաստանի բանկային համակարգի առաջատարներից ենք գրեթե բոլոր հիմնական ցուցանիշներով: Հայաստանի ֆինանսական համակարգում մեր բանկն ամենախոշոր հարկատուն է, իսկ ընդհանուր ցանկում մենք առաջին 15 տեղերում ենք: Մեր ակտիվներն արդեն գերազանցել են 1 մլրդ դոլարը: Մեր երկրի բանկային համակարգի պատմության մեջ սա աննախադեպ ցուցանիշ է»,- նկատեց նա:
Նշենք, որ համաձայնագրերից մեկով EBRD-ն «Ամերիաբանկ»-ի կապիտալում 40 մլն դոլար կներդնի: Առաջին փուլում բանկը կներդնի 30 մլն դոլար՝ բաժնետոմսերի շուրջ 20%-ի գնման համար: Մնացյալ 10 մլն-ը կօգտագործվի բանկի կապիտալի հետագա աճի համար:
Մյուս համաձայնագրով, IFC-ն «Ամերիաբանկ»-ին 50 մլն դոլարի չափով սուբորդինացված վարկ է տրամադրել:
«Ամերիաբանկ»-ը ակտիվներով, վարկային պորտֆելով, պարտավորություններով եւ ներդրումներով Հայաստանի խոշորագույն բանկերից է: Բանկի ընդհանուր կապիտալը ներկայում կազմում է գրեթե 200 մլն դոլար, իսկ 2015 թվականի վերջին ընդհանուր ակտիվները կազմել են շուրջ 1 մլրդ դոլար:
