«Ամերիաբանկ»-ի կապիտալում ներդրումները կվերափոխեն Հայաստանի բանկային հատվածը: Հունվարի 21-ին Երեւանում Վերակառուցման եւ զարգացման եվրոպական բանկի (ՎԶԵԲ) եւ Միջազգային ֆինանսական կորպորացիայի (IFC) հետ ֆինանսական համաձայնագրերի կնքման արարողության ժամանակ ունեցած ելույթում այս մասին հայտարարեց ՎԶԵԲ ֆինանսական կառույցների տնօրեն Նիք Թեսեյմանը:
«Ամերիաբանկ»-ի հետ ՎԶԵԲ-ի նախորդ նախագծերը հաջողություն են ունեցել՝ լինի դա փոքր եւ միջին բիզնեսի ֆինանսավորում, էներգաարդյունավետության կամ առեւտրային ֆինանսավորման ծրագրեր:
Այժմյան ծրագիրն ամենախոշորը կլինի, իսկ դա նշանակում է՝ ոչ դյուրինը: «Հսկայական աշխատանք պետք է տարվի «Ամերիաբանկ»-ի ծառայություների որակի աջակցման եւ Հայաստանի բանկային հատվածի վերակազմավորման համար»,- հայտարարեց նա:
Ըստ համաձայնագրի, ՎԶԵԲ-ն իր ներկայացուցչին կառաջադրի «Ամերիաբանկ»-ի տնօրենների խորհրդում՝ կորպորատիվ կառավարման լավագույն պրակտիկան ներդնելու համար: Իսկ եթե խոսենք բանկի վարկային քաղաքականության մասին, ապա ոչ մի փոփոխություն չի պահանջվում:
«Մենք ուզում ենք, որպեսզի բանկը շարունակի աշխատել նույնքան լավ, ինչպես նախկինում»,- հավելեց ՎԶԵԲ ներկայացուցիչը:
Նշենք, որ համաձայնագրերից մեկով EBRD-ն «Ամերիաբանկ»-ի կապիտալում 40 մլն դոլար կներդնի: Առաջին փուլում բանկը կներդնի 30 մլն դոլար՝ բաժնետոմսերի շուրջ 20%-ի գնման համար: Մնացյալ 10 մլն-ը կօգտագործվի բանկի կապիտալի հետագա աճի համար:
Մյուս համաձայնագրով, IFC-ն «Ամերիաբանկ»-ին 50 մլն դոլարի չափով սուբորդինացված վարկ է տրամադրել:
«Ամերիաբանկ»-ը ակտիվներով, վարկային պորտֆելով, պարտավորություններով եւ ներդրումներով Հայաստանի խոշորագույն բանկերից է: Բանկի ընդհանուր կապիտալը ներկայում կազմում է գրեթե 200 մլն դոլար, իսկ 2015 թվականի վերջին ընդհանուր ակտիվները կազմել են շուրջ 1 մլրդ դոլար:
