Լոս Անջելեսի դատարանը յոգայի հանրահայտ գուրու Բիքրամ Չոուդհուրիին` Բիքրամ-յոգայի դպրոցի հիմնադրին պարտավորեցրել է 924,5 հազար դոլար վճարել նախկին աշխատակցուհուն, որովհետեւ նրան աշխատանքից հեռացրել է այն բանից հետո, երբ նա սկսել է հետաքննել յոգայի ուսուցչի կողմից աշակերտուհուն բռնաբարելու դեպքը, փոխանցում է Americaru-ն:
Մինաքշի Ջաֆա-Բոդդենը դատարան է դիմել, որովհետեւ տուժել է սեռական խտրականությունից, անիրավաչափ պաշտոնանկումից: Բացի այդ, նա գուրուի համար պատիժ է պահանջել, որովհետեւ վերջինս նրան սեռական հետապնդման է ենթարկել: Գուրուի նախկին աշխատակցուհին հայտնել է, որ 69-ամյա Չոուհուրին դաժանորեն է վարվել եւ բռնաբարել է իրեն եւ այլ աշխատակիցների: Գուրուն չի ընդունել իր մեղքը եւ այդ հայտարարությունները սուտ է անվանել: Երդվյալները մոտ մեկ օր խորհրդակցել են եւ վճիռ են կայացրել հօգուտ Մինաքշի Ջաֆա-Բոլդենի:
Նրա հայտը միակ դատական գործը չէ արտառոց գուրուի դեմ, որը յոգայի կայսրություն է կառուցել եւ ունեցվածք է կուտակել 1971-ին Կալիֆորնիա տեղափոխվելուց հետո: Նա միլիոններ է վաստակել յոգայի իր ոճի հետեւորդներից, որը ներառում է 26 ասանա, որոնք կատարվում են 90 րոպեի ընթացքում` լավ տաքացված սենյակում: Վեց այլ կին վերջին տարիներին դատի են տվել Չոուհուրիին` պնդելով, որ նա իրենց սեռական բռնության եւ հետապնդման է ենթարկել:
