Եվրոպայի խորհուրդը Հայաստանին  կոչ է արել փողերի լվացման հետաքննության եւ դատական հետապնդման ազդեցիկ ազգային քաղաքականություն իրականացնել։

Այս մասին ասված է Եվրոպայի խորհրդի՝  Փողերի լվացման եւ ֆինանսական հանցագործության դեմ պայքարով զբաղվող փորձագետների հանձնաժողովի զեկույցի մեջ։

Զեկույցի համաձայն՝ Հայաստանը ընդհանուր առմամբ առաջընթաց է գրանցել  կայուն իրավական բազա ստեղծելու, կանխարգելիչ միջոցառումներ ձեռնարկելու եւ  ֆինանսական հանցագործությունները հայտնաբերելու ու կանխելու ավելի արդյունավետ աշխատանք իրականացնելու հարցում։  Զեկույցում նշվում է, որ մաքսանենգությունը, հարկերից խուսափելն ու խարդախությունը Հայաստանի համար փողերի լվացման ամենամեծ ռիսկերն են պարունակում։

Հայաստանի տնտեսությունն ու բանկային համակարգը առավել խոցելի են փողերի լվացման  համար։ Ֆինանսական գիտելիքները բավականին արդյունավետ են օգտագործվում, մինչդեռ օրենքը ոչ միշտ է արդյունավետ գործում՝ փողերի լվացումը կանխելու համար, ասված է զեկույցում։

Նշենք, որ Հայաստանը Հանձնաժողովի այս զեկույցին պետք է պատասխանի 2018թ. ապրիլին։ Իսկ մինչ այդ պետությունը պետք է 2016թ. դեկտեմբերին միջանկյալ զեկույց ընդունի։