Սկսվող համաճարակի նախաշեմին հանրակրթական դպրոցներում ձմեռային արձակուրդների երկարաձգումը ճիշտ որոշում էր, որի շնորհիվ կարողացանք շրջանցել եւ համաճարակը եւ աշակերտների նվազ մասնակցությունը: Այս մասին այսօր՝ փետրվարի 2-ին, լրագրողների հետ հանդիպման ժամանակ նշել է ԱԺ պատգամավոր, դպրոց-կենտրոնների միության նախագահ Ռուզաննա Մուրադյանը՝ հավելելով, որ բաց թողնված դասաժամերը ճիշտ կազմակերպման շնորհիվ կլրացվեն:
«Այսօր մենք ընդամենը երեք շաբաթ ենք բաց թողել դասընթացերը, փոխարենը՝ խուսափեցինք աշակերտների քիչ մասնակցությունից եւ համաճարակի տարածումից: Բայց մեր դպրոցներում դասավանդող ուսուցիչները պետք է կարողանան առարկայի չափորոշիչային պահանջն ապահովել ճիշտ մեթոդիկայի շնորհիվ: Ուսուցիչները մի քիչ ավելի ստեղծագործական մոտեցում կցուցաբերեն եւ, վստահ եմ, որ աշակերտներ թեմատիկ բացթողումներ չեն ունենա: Անհրաժեշտ կլինի նաեւ ծնողների եւ աշակերտների հետեւողականությունը, որպեսզի բացթողումը միահամուռ ուժերով լրացնենք»,-նշեց Ռուզաննա Մուրադյանը:
Երեւանի ավագանու «Բարեւ Երեւան» խմբակցության քարտուղար Անահիտ Բախշյանը, անդրադառնալով բացթողնված դասաժամերին, անդրադարձավ Հայաստանում հեռահար կրթության մեթոդի խնդրին:
«Այստեղ մի խնդիր կա, որի շուրջ պետք է մի քիչ մտածեն մեր պատկան մարմինները, հատկապես՝ կրթության ոլորտի: Կրթության կազմակերպման մասին օրենքով արդեն 15 տարի է ունենք հեռահար կրթության ձեւը, որը չի կիրառվում: Այսօր բոլոր դպրոցները ապահովված են ինտերնետով եւ համակարգչով, ընտանիքների գերակշիռ մասը եւս: Մենք նման դեպքերում պետք է օգտագործենք կրթության այդ ձեւը, որպեսզի երեխան 3 շաբաթով չկտրվի դասապրոցեսից»,-ասաց Անահիտ Բախշյանը:
Նրա խոսքով՝ հեռահար կրթության մեթոդը զարգացնելու գործում անելիք ունեն Կրթության ազգային ինստիտուտը եւ Կրթական տեխնոլոգիաների ազգային կենտրոնը:
