Պաշտոնական տվյալներով, անցյալ տարի Հայաստանում ֆիզիկական անձանց արտաքին դրամական փոխանցումների գումարը կրճատվել է 520 մլն դոլարով, այդ թվում Ռուսաստանից՝ ավելի քան 518 մլն դոլարով: Դրամական փոխանցումների ընդհանուր գումարը կազմել է շուրջ 1.21 մլրդ դոլար, այդ թվում «ռուսականը»՝ 0.92 մլրդ դոլարից քիչ պակաս:
Նշենք, որ վերջին հինգ տարիների ընթացքում սա ամենացածր ցուցանիշն է: 2013 թվականին դրամական փոխանցումների գումարը հասել էր առավելագույնին՝ 1.87 մլրդ դոլարի (այդ թվում Ռուսաստանից՝ 1.61 մլրդ դոլար):
Ռուսաստանի տնտեսությունում դրական տեղաշարժեր հիմա կարող են ակնկալել միայն անհույս լավատեսները: Նավթի համաշխարհային շուկայում երկու նշանակալի իրադարձությունների համընկնումը դժվար թե «պատահական» էր: Խոսքն ԱՄՆ-ում գրեթե կես դար տեւած նավթի արտահանման արգելքի չեղարկման, ինչպես նաեւ նավթ արտահանող առաջատար երկրներից մեկի՝ Իրանի դեմ սահմանված պատժամիջոցների թուլացման մասին է: Արդյունքում համաշխարհային շուկայում առաջարկի աճը նավթի գների հերթական անկման պատճառ դարձավ:
Նավթի Brent տեսակի ֆյուչերսների գինը մոտեցել է 30 դոլարի շեմին: Այսինքն, երկու տարվա ընթացքում նվազել է 3.5 անգամ: Հայտնի է, որ ռուսական արտահանվող Urals նավթի գինը որոշվում է Brent-ի արժեքի զեղչմամբ (ավելի քան 3 դոլար՝ մեկ բարելի դիմաց): Միաժամանակ, Ռուսաստանի՝ ընթացիկ տարվա դաշնային բյուջեում Urals-ի միջին տարեկան գինը հաշվարկվել է 50 դոլարով:
Նավթի համաշխարհային շուկայում տեղաշարժերը հերթական հարվածն էին Ռուսաստանի տնտեսության համար, որի եկամուտները մեծ մասամբ կախված են դրա արտահանումից: Դոլարի ամրապնդումը ինչպես ընթացիկ, այնպես էլ երկարաժամկետ բացասական հետեւանքներ ունի ռուսական տնտեսության համար:
Բնականաբար, արժույթների փոխարժեքն ազդել է նաեւ աշխատանքային միգրանտների դրամական փոխանցումների վրա: Հունվարի տվյալներով, Ռուսաստանում դոլարը վերջին երկու տարիների ընթացքում ամրապնդվել է 2.3 անգամ: Այսինքն՝ դոլարով նույնքան գումար փոխանցելու համար հիմա 2.3 անգամ ավելի շատ ռուսական ռուբլի է հարկավոր, քան երկու տարի առաջ:
Սմբատ Գրիգորյան