2008թ. մարտի 1-ի սպանությունների գործերի բաժանումը առանձին սպանությունների դրվագների գործին չի օգնի։ Այս մասին մարտի 1-ին լրագրողներին ասել է ՀԱԿ խմբակցության պատգամավոր Գագիկ Ջհանգիրյանը՝ մեկնաբանելով Հայաստանի Գլխավոր դատախազության այդ նախաձեռնությունը։

«Իհարկե, եթե կա մարտի 1-ի իրադարձությունների ընդհանուր նկարագրությունը, ապա կարելի է արդեն առանձնացնել սպանությունների գործերը։ Սակայն, ցավոք, այստեղ ոչ մի առաջընթաց չկա, եւ այդ մոտեցումն արդյունք չի տվել»,- ասել է Ջհանգիրյանը։ Անդրադառնալով հարցին, թե որտեղից նա գիտի այդ հարցով ինչ աշխատանք է ընթանում Գլխավոր դատախազության ներսում, պատգամավորը պատասխանել է, որ  ընդհատակյա տեղեկություններ ինքը չունի։ «Իհարկե կան իմ նախկին ուսանողները, որոնք այնտեղ աշխատում են, սակայն ես չեմ ուզում այդ ճանապարհով նրանցից տեղեկություն ստանալ։ Չգիտեմ, թե ինչու են առանձնացրել գործերը, սակայն այդ մեթոդը ոչնչի չի հանգեցրել։ Թե ինչ պատճառով, ինքներդ եզրակացություններ արեք»,- ասել է Գագիկ Ջհանգիրյանը։

Հիշեցնենք, որ 2008թ. մարտի 1-ին իշխանության եւ ընդդիմության միջեւ բախումների ժամանակ Երեւանի  կենտրոնում 8 ցուցարար եւ ներքին զորքերի 2 ծառայող էր զոհվել։ Մարդկանց մահվան համար մինչ օրս ոչ ոք պատասխան չի տվել։