Հայաստանում մանրածախ վաճառքում վաղուց բացասական միտումներ էին նկատվում, որոնք շարունակվում էին նաեւ այս տարվա հունվարին: Խոսքը ընթացիկ գներով մանրածախ առեւտրի հաստատությունների եկամուտների կրճատման մասին է: Այսպես՝ հունվարին մանրածախ ապրանքաշրջանառության ծավալները տարեկան հաշվարկով կրճատվել են 6.5 մլրդ դրամով կամ 8.3 տոկոսով:
Օբյեկտների թվում ապրանքաշրջանառության նկատելի անկում է գրանցվել խանութներում՝ 3.7 մլրդ դրամ կամ 16 տոկոս: Հիշեցնենք, որ անցյալ տարի ապրանքաշրջանառության ամենամեծ անկումը գրանցվել էր խոշոր առեւտրային օբյեկտներում:
Կարելի է, իհարկե, այդտեղ ստվերային ապրանքաշրջանառության աճ դիտել: Սակայն եթե հաշվի առնենք մի կարեւոր գործոն, այն է՝ արտաքին մասնավոր տրանսֆերտների կրճատումը, որն անցյալ տարի կազմել է ավելի քան 0.5 մլրդ դոլար: Համաձայնեք, որ սա մեր երկրի համար փոքր գումար չէ: Հասկանալի է, որ հանրապետության բնակիչների՝ այլ աղբյուրներից ստացված եկամուտները բոլորովին չեն փոխհատուցել այդ անկումը: Որպես կանոն՝ բնակչության ընդհանուր վճարունակությունը նվազել է, եւ որպես հետեւանք՝ պակասել են ապրանքների գնման ծախսերը:
Եթե դիտարկենք հունվարի շրջանառությունը ներկայիս գներով վերջին 5 տարվա ընթացքում, ապա նկատելի է հետեւյալ տեղաշարժը (գրաֆիկ): Խանութներում ապրանքաշրջանառությունը կրճատվել է անցյալ տարի: Իսկ մյուս օբյեկտներում՝ տոնավաճառներ, շուկաներ, բենզալցակայաններ եւ գազալցակայաններ, անկումը գրանցվել էր դրանից մեկ տարի առաջ:
Չափազանցություն կլիներ համարել, որ մեր առեւտրականները ապրանքների վրա նվազագույն գնապիտակներ են դնում: Այդ պատճառով էլ կայունության պաշարները որոշ օբյեկտների թույլ են տալիս գոյատեւել նաեւ կրճատված եկամուտներով: Սակայն ասվածը դժվար թե արդարացի կլինի փոքր օբյեկտների դեպքում: