Երեւանի Էրեբունի համայնքի մաս կազմող Ջրաշենում մսատու կենդանիները սատկում են անհայտ հիվանդությունից. Ջրաշենցիները համոզված են, որ գյուղում մսատու կենդանիների դաբաղ համաճարակ է տարածված, սակայն, պատասխանատու մարմինները ոչինչ չեն անում` անասուններին փրկելու համար: Արդեն երկար տարիներ անասնապահությամբ զբաղվող գյուղացիները, սակայն, զարմացած են, որ տարվա այս սեզոնին դաբաղ հիվանդություն կա: Ջրաշենցիների խոսքով, անասունների սատկելու մեղավորը նաեւ համայնքի անասնաբույժն է` ժամանակին կենդանիներին չի պատվաստել, որի հետեւանքով 30 կով եւ 6 հորթ է սատկել:
NEWS.am-ի հետ զրույցում 77-ամյա Եսլով Գեւորգյանը, որի կովը մեկ շաբաթ առաջ է սատկել, նշեց, որ ահազանգել են պատասխանատու մարմիններին, սակայն, մինչեւ այսօր, դեռ ոչ ոք չի գնացել համայնք` հասկանալու անասունների անկման պատճառը: Եսլով պապի խոսքով, համայնքի անասնաբույժին էլ երկար ժամանակ չեն տեսել` զանգում են, ասում է` «հեռու եմ ապրում, Արաբկիրում, ոնց գամ»:
«Իմ կովը լավ էր, առավոտ եկանք, տեսանք վեր է ընկել, սատկել է: Մենք ոչ մի բան չենք ուզում, մենակ մասնագետ է պետք, տեսնենք` ինչն է պատճառը: Մորթել ենք կովին, միսը կերել ենք, բա չգան տեսնեն` էս ինչ հիվանդություն ա, իմանանաք` գլխներիս ինչ ա գալու»,-ասում է Եսլով պապը:
Ջրաշենցի Անահիտ տատիկն էլ, որի հորթը մի քանի օր առաջ է սատկել, նշում է, որ անհրաժեշտ է լաբորատոր քննության ենթարկել հիվանդ կենդանիների միսը` հասկանալու համար հիվանդության պատճառը:
«Հորթս` Իվանաս, սրանից մի քանի օր առաջ լուծ էր ընկել, դեղեր տվեցինք անցավ, սակայն, երկու շաբաթ անց իրիկունը հիվանդացավ, գիշերն էլ սատկեց: Խեղճացել էր, զոռով կաթ տվեցի Իվանիս, մի կերպ կերավ: Անասնաբույժին էլ քանի անգամ զանգեցի, ասում է` գործ ունի ժամանակ չունի, բա անասնաբույժ ես, չգաս սրսկես, տեսնես` ոնց են անասունները: Վերջին անգամ երկու տարի առաջ է եկել, դրա դեմքը երկու տարի է չենք տեսել: Հորթը սատկեց, միսը տվեցինք հարեւանի շանը կերավ, շունը շահեց, մենք չէ»,- կատակով պատմում է 71-ամյա Անահիտ տատը:
Ջրաշենցի տիկին Նելլին էլ, որի հորթը երեկ է սատկել, այժմ անհանգստացած է իր խոզերի ճակատագրով. վարակվել են, հրաժարվում են ուտել, անընդհատ պառկած են, իսկ հեռու ապրող համայնքի անասնաբույժն էլ հրաժարվում է հասնել Ջրաշեն եւ հասկանալ անասունների անկման պատճառը.«Անասնաբույժին չենք տեսել, հատուկենտ մարդկանց տներն է մտել, չենք էլ ճանաչում մինչեւ հիմա, երեք տարի է տեղամասային անասնաբույժ է: Զանգեցինք ասացինք արի, ասում է` 10000 դրամ տաքսու գումար եք վճարելու, որ Քանաքեռից հասնեմ էդտեղ: Մի քանի խոզ ունեմ, որոնք վատ են, վարակվել են, սկզբից վատ կեր են ուտում, հետո ոտքերն է ցավում, պճեղներն են պոկվում ու սատկում են: Սրանցով ենք մենք ապրում, դա էլ չկա արդեն»:
Նշենք, որ Սննդամթերքի անվտանգության պետական ծառայությունից հաղորդել են, որ «Գյուղատնտեսական կենդանիների պատվաստում» ծրագրի շրջանակում ապրիլի 1-ից հանրապետության ողջ տարածքում իրականացվում են պատվաստումներ` դաբաղի նոր՝ AG-VII, ենթատեսակի կանխարգելման նպատակով:
Վերջին ամիսներին տարածաշրջանի երկրներում, մասնավորապես՝ հարեւան Թուրքիայում եւ Իրանում, արձանագրվել էր դաբաղի հենց այս ենթատեսակը, որի տարածման վտանգն առկա է նաեւ մեր հանրապետությունում:
