Հայաստանի վճարային հաշվեկշիռը 2010 թ. 6 ամիսների կտրվածքով բացասական է մոտ 28 մլն դոլարով։ Այս մասին նշված է Ազգային վիճակագրական կոմիտեի այսօր հրապարակած տեղեկատվության մեջ:
Վճարային հաշվեկշիռն արտահայտում է դրսից ստացվող եւ դեպի դուրս գնացող բոլոր ֆինանսական հոսքերի մնացորդը։ 2009 թ. նույն ժամանակահատվածում վճարային հաշվեկշիռը եղել է դրական՝ 13,7 մլն դոլար։
Վճարային հաշվեկշիռն ունի 2 մաս՝ ընթացիկ հաշիվ եւ կապիտալի հաշիվ։ Ընթացիկ հաշիվը ավանդաբար բացասական է, այս տարի այն աճել է 159 մլն դոլարով եւ կազմել -695 մլն դոլար։ Ընթացիկ հաշվի բացասական մնացորդը հիմնականում պայմանավորված է արտաքին առեւտրի բացասական հաշվեկշռով։
Կապիտալի հաշիվը, ընդհակառակը՝ դրական է եւ կազմում է 667 մլն դոլար։ Կապիտալ հաշվում վճռորոշ դեր են խաղում օտարերկրյա ուղղակի ներդրումները եւ օտարերկրյա վարկերը։