Մինսկի խմբի երկրների ԱԳ նախարարները, պաշտոնական Վաշինգթոնը, պաշտոնական Փարիզն ու պաշտոնական Մոսկվան ընդունել են պաշտոնական Երեւանի առաջարկները եւ ունեն նույն տեսլականը, ինչ պաշտոնական Երեւանը: Այս մասին, այսօր՝ մայիսի 17-ին, ԱԺ-ում լրագրողների հետ զրույցում նշել է ԱԺ փոխնախագահ Էդուարդ Շարմազանովը՝ անդրադառնալով Վիեննայում ԵԱՀԿ Մինսկի խմբի համանախագահող երկրների ԱԳ նախարարների համատեղ հայտարարությանը:
«Ադրբեջանն ասում էր՝ հողերից դուրս եկեք, նոր ներդնենք մեխանիզմներ, մենք տեսանք, որ այստեղ եւս Ադրբեջանն իր նպատակին չհասավ: Իսկ ՀՀ նախագահի առաջարկ՝ որ հետաքննության մեխանիզմների իրականացումը պարտադիր է այս փուլում, ընդունվեց 3 համանախագահ երկրների կողմից»,-ասաց նա:
Շարմանազնովը նկատեց, որ Վիեննայում ընդունված հայտարարությունում նշվեց, որ է բացառապես խաղաղ կարգավորում պետք է լինի: «Այսինքն Ադրբեջանի նպատակը զինադադարը խախտել, նոր զինադադար պարտադրել, նոր զիջումներ կորզել, նոր քաղաքական փաստաթուղթ ի հայտ բերել, Ղարաբաղին հանել բանակցություններից, չիրականացավ: Մեկ բառով ասած այս հանդիպումը ցույց է տալիս, որ Մինսկի խմբի երկրների ԱԳ նախարարները, պաշտոնական Վաշինգթոնը, պաշտոնական Փարիզն ու պաշտոնական Մոսկվան ընդունել են պաշտոնական Երեւանի առաջարկները եւ ունեն նույն տեսլականը, ինչ պաշտոնական Երեւանը»,-ասաց նա:
«Ընդհանուր առմամբ կարող ենք ասել, որ նախագահ Սարգսյանի առաջարկներն ընդունվել են եւ ընդունվել են ոչ միայն բանավոր, այլեւ իրենց արտացոլումն են ստացել երեկվա հայտարարության մեջ: Սա շատ կարեւոր է: Բանակցությունների վերսկսման համար հանրապետության նախագահը տվել էր մի շարք առաջարկներ ու թեզիսներ եւ երեկ Վաշինգթոնը, Փարիզն ու Մոսկվան հստակ նշեցին, որ համամիտ են պաշտոնական Երեւանի կարծիքի հետ: Երկրորդ՝ վերահաստատելով 1994-ի զինադադարի ռեժիմը նրանք անուղղակիորեն ընդունում են, որ այլ սկզբունքներ չեն կարող գործել, հետեւաբար պաշտոնական Բաքվի ցանկությունները չիրականացան: Բաքվի որեւէ պահանջ չի իրականացել»,-ընդգծեց Շարմազանովը՝ հավելելով, որ սա հնարավոր եղավ մեր բանակի, զինվորների քաջության շնորհիվ եւ «մեր բանակի ձեռքբերումն ամրագրվեց ու ամրապնդվեց այս հայտարարությունում»:
Ավելի վաղ NEWS.am-ը հայտնել էր, որ ՌԴ ԱԳ նախարար Սերգեյ Լավրովը, ԱՄՆ պետքարտուղար Ջոն Քերին եւ Ֆրանսիայի Եվրոպական հարցերով նախարար Արլեմ Դեզիրը Վիեննայում հանդես են եկել համատեղ հայտարարությամբ:
