Եթե ադրբեջանցիները դրժեն իրենց խոստումները եւ խախտեն հրադադարի պայմանները, մենք այլ ելք չենք ունենա, քան համարժեք պատասխանել: Այս մասին Վիեննայից վերադառնալու ճանապարհին օդանավում լրագրողներին ասել է Հայաստանի նախագահ Սերժ Սարգսյանը՝ անդրադառնալով նախօրեին Վիեննայում կայացած հանդիպման արդյունքներին:
«Արդյունքները կյանքը ցույց կտա: Հիմա որեւէ մեկի անունից հավաստիացումներ անելը ճիշտ չի իմ կողմից: Իրոք, մեր նպատակն է, որպեսզի մեր խնդիրները լուծենք խաղաղ ճանապարհով եւ բանակցությունների միջոցով: Բայց եթե ադրբեջանցիները դրժեն իրենց խոստումները եւ խախտեն հրադադարի պայմանները, մենք այլ ելք չենք ունենա, քան համարժեք պատասխանելը: Իրականությունը սա է: Հուսով եմ, որ խախտումները քիչ կլինեն: Ես չեմ կարծում, որ վաղվանից ընդհանրապես բացառվելու են խախտումները: Հուսով եմ, որ շատ ավելի հանդարտ կլինի, քան էր մինչ այսօր»,- նշել է հանրապետության ղեկավարը:
Նրա խոսքով, պայմանավորվածությունների ձեռք բերմանը մենք շատ մեծ ուշադրություն չպիտի դարձնել՝ հաշվի առնելով անցյալ տարիների մեր փորձը: «Մենք 20 հանդիպում ենք ունեցել, այդ հանդիպումների ընթացքում բազմաթիվ բաների մասին ենք պայմանավորվել, բայց Ադրբեջանի նախագահը վերադառնալով Բաքու բոլորովին այլ հայտարարություններ է արել: Կյանքը ցույց կտա, թե այս անգամ ինչպես իրադարձությունները կզարգանան: Մեզ համար կարեւորը հետեւյալն է, որպեսզի համանախագահները մեկ անգամ եւս համոզվեն, որ մեր նպատակը նախ ստատուս քվոյի պահպանումը չէ, եւ մեր նպատակը չէ հավերժ պատերազմել, մենք ցանկանում ենք մեր խնդիրը լուծել խաղաղ ճանապարհով: Մենք ցանկանում ենք, որպեսզի ավելորդ կորուստներ չունենանք: Որեւէ պարագայում ես չեմ համարում արդարացված մեր լավագույն տղաների՝ հանուն հայրենիքի զոհվելը: Շատ լավ կլինի, որ հանուն հայրենիքի նրանք գործեն, հանուն հայրենիքի ապրեն: Բայց եթե նորից եմ կրկնում, ադրբեջանցիները խախտեն հրադադարի պայմանները, մենք ուղղակի ստիպված ենք լինելու պատասխանել, որովհետեւ չպատասխանելը բերում է էլ ավելի մեծ խախտումների»,-ասել է Սերժ Սարգսյանը:
Հիշեցնենք, որ նախօրեին Վիեննայում կայացած բազմակողմ հանդիպման արդյունքներով ԵԱՀԿ ՄԽ համանախագահ երկրների արտգործնախարարները համատեղ հայտարարություն էին ընդունել:
