Անդամակցելով ԵՏՄ-ին՝ մենք զրկել ենք մեզ այլընտրանքներից, բոլոր միջազգային հարթակներում հայտնվել ենք փոքրամասնության ու մերժվածների մեջ: Այս մասին, այսօր՝ հունիսի 3-ին, Հայաստանի ԱԺ Արտաքին հարցերի մշտական հանձնաժողովում «ԵՏՄ-ին ՀՀ անդամակցության դադարեցման գործընթաց սկսելու մասին» օրինագծի քննարկման ժամանակ նշել է օրինագծի հեղինակ Խաչատուր Քոքոբելյանը՝ հավելելով, թե մենք մեզ համառորեն համոզում ենք, թե դա դրական տեղաշարժ է:
«ԵՏՄ անդամ դառնալով՝ մենք գնալով զրկվում են միջազգային ներդրումներից: Դրա համար օր առաջ պետք է կասեցնենք մեր անդամակցությունը: Հասարակության մեջ հիմա մեծ շերտ կա, որ ընդվզում է, քանի որ մեզ ոչինչ չտվեց ԵՏՄ-ն, ՀԱՊԿ անդամ լինելը: Մենք այդպես էլ չստացանք ՌԴ այն 200-միլիոնանոց զինտեխնիկան: Ես կարծում եմ, որ հենց դա էր ապրիլյան քառօրյա պատերազմի սկսելու հիմնական պատճառներից մեկը»,-ընդգծել է պատգամավորը՝ հավելելով, որ չի կիսում տեսակետը, թե ՀՀ-ն այլընտրանք չուներ ԵՏՄ անդամակցությանը:
Քոքոբելյանը նշել է, որ կցանկանար, որ ԱԺ Արտաքին հարաբերությունների հանձնաժողովում այս հարցում համաձայնություն լիներ, համերաշխության մթնոլորտում անցներ օրինագիծը. «Ես կուզենամ համերաշխության մթնոլորտում սա անցնի: Ես ուզում եմ, որ չդառնանք հիմա ՌԴ փաստաբանները, այլ պաշտպանենք մեր շահերը»:
Անդրադառնալով Ռուսաստանի կողմից Ադրբեջանին զենքի վաճառքին, նա նշել է, որ Բաքուն իր սպառազինության 80 տոկոսը գնում է հենց Ռուսաստանից, երկրորդը Բելառուսն է, իսկ Հայաստանը լինելոբ ՀԱՊԿ անդամ չի կարողացել կասեցնել այդ գործընթացը:
Հանձնաժողովի նախագահ Արտակ Զաքարյանը հայտարարել է, որ եթե օրինագիծը քվեարկության դրվի, ինքը դեմ կքվեարկի, քանի որ դրանում կան վիճելի դրույթներ: