Հոկտեմբերի 4-ին կայացել է Հայաստանի ԱԳ նախարար Էդվարդ Նալբանդյանի հանդիպումը աշխատանքային այցով Երեւանում գտնվող Վրաստանի ԱԳ նախարար Գրիգոլ Վաշաձեի հետ:
ԱԳՆ մամուլի ծառայությունից NEWS.am-ին հայտնում են, որ հանդիպումը մեկնարկել է առանձնազրույցի ձեւաչափով, ապա շարունակվել պատվիրակությունների մասնակցությամբ:
Հայաստանի եւ Վրաստանի ԱԳ նախարարները հանգամանալից քննարկել են երկկողմ հարաբերություններին վերաբերող հարցերի լայն շրջանակ:
Անդրադարձ է կատարվել երկու երկրների նախագահների միջեւ ձեռք բերված պայմանավորվածությունների կատարման ընթացքին, տնտեսական, տրանսպորտային եւ էներգետիկ բնագավառներում համագործակցությանը, զբոսաշրջության զարգացմանը, գործարար համաժողովների կազմակերպմանը, միջազգային կազմակերպություններում համագործակցությանը, արտգործնախարարությունների միջեւ խորհրդատվությունների անցկացմանը:
Նրանք մտքեր են փոխանակել նաեւ իրավապայմանագրային դաշտի ընդլայնման շուրջ:
Հայկական կողմի նախաձեռնությամբ անդրադարձ է կատարվել նաեւ վիրահայությանն առնչվող մի շարք հարցերի, մասնավորապես` կրթության եւ հայկական մշակութային ժառանգության պահպանմանն առնչվող խնդիրների:
Հայ-վրացական մշակութային համագործակցության քննարկման ենթատեքստում նախարար Նալբանդյանը գոհունակություն է հայտնել մշակութային ոլորտում արձանագրված փոխանակումների ակտիվացման կապակցությամբ: Կարեւորվել է կուտակած դրական փորձի շարունակականության ապահովումը:
Նախարարների հանդիպմանը հետեւել է համատեղ մամուլի ասուլիս:
Գրիգոլ Վաշաձեն Վրաստանի արտաքին քաղաքականության մասին դասախոսությամբ հանդես է եկել նաեւ ԱԳՆ դիվանագիտական դպրոցի ունկնդիրների առջեւ: