Անիի Մայր տաճարում նամազի արարողություն անցկացնելը պայմանավորված չէր Աղթամարի Սուրբ Խաչ եկեղեցու պատարագին Մայր Աթոռ Սուրբ Էջմիածնի ներկա չլինելու փաստով. պատճառը ներքին օգտագրծման համար իսլամիստական միտումները շրջանառության մեջ դնել էր, որոնք դրսեւորվեցին Անիի Մայր տաճարում նամազ իրականացնելու մեջ։ Հոկտեմբերի 5-ին լրագրողների հետ հանդիպման ժամանակ նման տեսակետ հայտնեց Մայր Աթոռ Սուրբ Էջմիածնի դիվանապետ Արշակ եպիսկոպոս Խաչատրյանը։
Նրա խոսքով, դա պարզապես նամազի արարողություն չէր, այլ քաղաքական ակցենտներ պարունակող երեւույթ։ «Արմատական իսլամիստները խուսափում են քրիստոնեական եկեղեցիներում արարողություններ մատուցելուց: Սա, պարզապես, մեր ժողովրդին ուղղված մի պարզ ուղերձ էր, որ քրիստոնեական պաշտամունքային կոթողները պատկանում են Թուրքիային։ Սա իրավատերերի հետքերը ջնջելու մի փորձ էր»,- նկատեց հոգեւորկանը։
Ամփոփելով՝ Արշակ եպիսկոպոս Խաչատրյանը կեսկատակ-կեսլուրջ նշեց. «Թուրքերը նամազն Անիի Մայր տաճարում անցկացրեցին՝ հասկանալով, որ այնտեղից Աստծո հետ հաղորդակցությունն ավելի լավ է ստացվում»։
Նշենք, որ Անիի կործանումից հետո՝ 1064 թվականից սկսած շուրջ 60 տարի, Անիի Մայր տաճարը գործել է որպես մզկիթ։ Վրաց Դավիթ թագավորը, գրավելով մայրաքաղաք Անին, այն վերադարձրել է քրիստոնյաներին, ինչից հետո էլ Մայր տաճարը շուրջ 300 տարի ծառայել է որպես քրիստոնեական եկեղեցի:
Հիշեցնենք, որ Թուրքիայի «Ազգայնական շարժում» կուսակցության ղեկավար Դեւլեթ Բահչելին իր համակիրների հետ այսօր՝ հոկտեմբերի 1-ին հայկական Անիի Մայր տաճարում իրականացրել է ուրբաթօրյա նամազը: Նամազից հետո ելույթ ունեցած Դեւլեթ Բահչելին քննադատության է ենթարկել թուրքական իշխանություններին՝ մեղադրելով Աղթամարում եւ Սումելայում իրականցված պատարագների համար: