Իմ վրա շիշ նետողը դիմեց փախուստի, եթե մնար, մի փոքր կծեծեի: Այս մասին NEWS.am-ի հետ զրույցում նշեց ՀԱԿ խմբակցության պատգամավոր Հրանտ Բագրատյանը՝ անդրադառնալով ԱԺ մուտքի մոտ տեղի ունեցած միջադեպին, երբ ակտիվիստներից մեկը շիշ էր նետել նրա ուղղությամբ:
«Ես գնացի բողոքի ակցիայի, հանդիպեցի ցուցարարների հետ, բացատրում էի ՀՕՊ համաձայնագիրը: Ամենակարեւորը՝ իրենց հետաքրքրում էր, թե Ղարաբաղի հետ հարցը ոնց կլինի: Ասացի այն, ինչ-որ գրված է պայմանագրում եւ ասացի, որ համաձայնագրին դեմ կամ ձեռնպահ կլինի մի 10 հոգի: Ինչ-որ մեկը ագրեսիվ մոտեցավ ինձ, ասեց՝ դու էլ ես նույնը, Սերժն էլ, Ռոբերտն էլ: Չհասկացա, թե այդ ֆրազան ինչ կապ ունի այս ամենի հետ: Նայեցի դրան՝ ասացի պրովոկացիա ես անում: Մի հատ շիշ վերցրեց ու տակով շպրտեց իմ վրա: Շշով ինձ չի խփել»,-ասաց Բագրատյանը:
Հարցին, թե արդյոք ոստիկանները միջամտեցին այդ պահին, Բագրատյանը պատասխանեց. «Այո, եթե ոստիկաններն էդտեղ չլինեին, նա կստանար իր պատասխանը: Սա կարող է լինել խելագար, իշխանության ներկայացուցիչ, քանի որ ես դեմ եմ համաձայնագրին, ինքն էլ կողմ է, կարող էր լինել ադրբեջանական շպիոն, կարող էր լինել վրացի մենշեւիկ»:
Նա հավելեց, որ դեպքի հետ կապված շուտով իրավապահները պիտի այցելեն իրեն:
Ավելի վաղ NEWS.am-ը հայտնել էր, որ Ռուսաստանի հետ միասնական Հակաօդային պաշտպանության համաձայնագրի դեմ «Մենք ենք տերը մեր երկրի» նախաձեռնության կազմակերպած բողոքի ակցիայի ժամանակ այսօր՝ հունիսի 27-ին, ԱԺ հետնամուտքի մոտ ցուցարարներից մեկը շիշ է նետել ԱԺ պատգամավոր Հրանտ Բագրատյանի ուղղությամբ:
Ոստիկանությունը բերման է ենթարկել շիշ նետող տղամարդուն՝ մարմնական վնասվածք հասցնելու կասկածանքով:
Նշենք, որ Ռուսաստանի հետ համատեղ Հակաօդային պաշտպանության համաձայնագրի վավերացման հարցն ընդգրկված է ԱԺ արտահերթ նստաշրջանի օրակարգում:
Հունիսի 3-ին ՀՀ ԱԺ արտաքին հարաբերությունների մշտական հանձնաժողովի նիստում քննարկվել է 2015թ. դեկտեմբերին ստորագրված «ՀՀ եւ ՌԴ միջեւ Հավաքական անվտանգության կովկասյան տարածաշրջանում ՀՕՊ միավորված տարածաշրջանային համակարգ ստեղծելու մասին» համաձայնագիրը: Այն դրական եզրակացությամբ ընդգրկվել է ԱԺ նիստերի օրակարգում՝ վավերացման համար:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից:
