Ռուսաստանի՝ ԵՏՄ մեր գործընկերոջ տնտեսության վիճակը հեռու է միանշանակ լինելուց: Այսպես՝ Ռուսաստանում արդյունաբերական արտադրանքի ծավալը հունվար-հունիսին տարեկան հաշվարկով աճել էր խորհրդանշական 0,4 տոկոսով: Դրանում իր «ներդրումն» ուներ օգտակար հանածոների արդյունահանումը (աճել է 2,6 տոկոսով), մինչդեռ վերամշակող արդյունաբերությունում գրանցվել է անկում (0,9 տոկոսով):
Օգտակար հանածոների ոլորտում դրական ցուցանիշը զգալիորեն ապահովել էր նավթը, որի արդյունահանումը աճել է 2,9 տոկոսով: Ինչպես հայտնի է, Ռուսաստանում արդյունահանվող հում նավթի շոշափելի մասը (ընդհանուր ծավալի կեսի կարգի) երկրում է մնում՝ հետագա մշակման համար:
Դրա հետ մեկտեղ, ռուսական նավթի արտահանումը նշված ժամկետում ավելացել է 5,8 տոկոսով: Այստեղից կարելի է ենթադրել, որ հետագա մշակման համար երկրում մնացող նավթի բաժինը որոշ չափով կրճատվել է: Ավտոմեքենայի բիզնեսի արտադրությունն, օրինակ, աճել է 1,3 տոկոսով, իսկ ահա դիզվառելիքը կրճատվել է 1,7 տոկոսով: Քանի որ արտադրության ծավալով դիզվառելիքը 1,9 անգամ գերազանցում է ավտոմեքենայի բիզնեսի ցուցանիշը, այս ոլորտում ընդհանուր առմամբ անկում է գրանցվել:
Չնայած հում նավթի համաշխարհային գների նվազմանը, Ռուսաստանում ընթացիկ տարում բենզինի գինը շարունակել է աճել: Դրա պատճառներն են ավտոլցակայանների համակարգում չարաշահումները, ինչպես նաեւ բենզինի ակցիզի կրկնակի թանկացումը: Նշենք, որ բենզինի արտահանման դեպքում (այդ թվում՝ Հայաստան) ակցիզային հարկը արժեքից հանվում է:
Ինչպես հայտնի է, Ռուսաստան մեկնող մեր աշխատանքային միգրանտների մեծ մասը զբաղված է շինարարության ոլորտում: Մինչդեռ այդ ոլորտում իրավիճակն ամենեւին հուսադրող չէ: Դրա առաջատար ճյուղերից մեկում՝ բնակարանային շինարարության մեջ նկատվում են բացասական միտումներ: Դա մասնավորապես անդրադառնում է մի շարք հիմնական շինանյութերի արտադրության դինամիկայի վրա:
Այսպես՝ հունվար-հունիսին ցեմենտի արտադրությունը կրճատվել է 12,5 տոկոսով, աղյուսինը՝ 19,4 տոկոսով, երկաթբետոնե հավաքովի կառուցվածքներինը եւ դետալներինը՝ 19,3 տոկոսով եւ այլն:
Հավելենք, որ ռուսաստանցի մի շարք փորձագետներ ընթացիկ տարվա համար բնակարանային շինարարության ճյուղում կանխատեսում են երկնիշ անկում: Հիմնական պատճառը բնակարանների առաջնային շուկայում վճարունակ պահանջարկի կրճատումն է: Հասկանալի է, որ ճյուղում շինարարության կրճատումը կհանգեցնի բանվորական ուժի պահանջարկի նվազման: Չի բացառվում նաեւ շինարարական կազմակերպություններում աշխատավարձի վճարման սառեցման:
Սմբատ Գրիգորյան