Հուլիսի 29-30-ին Սարի թաղի եւ Խորենացի փողոցներում ցուցարարների նկատմամբ ոստիկանների գործողությունների հետ կապված  ոստիկանության ներքին անվտանգության վարչությունում ծառայողական քննություն էր սկսվել։

NEWS.am-ի տեղեկություններով՝ ծառայողական քննության արդյունքում կասեցվել է ոստիկանության ներքին զորքերի հրամանատար, փոխոստիկանապետ Լյովա Երանոսյանի եղբայր Լեռնիկ Երանոսյանի լիազորությունները։ Մի շարք բարձրաստիճան պաշտոնյաներ տույժերի են ենթարկվել, որոնց թվում է Երեւանի ոստիկանապետ Աշոտ Կարապետյանը։

Հիշեցնենք, որ Լեռնիկ Երանոսյանը աշխատում է ներքին զորքերում, հուլիսի 30-ին Սարի թաղում ցույցը ցրելու ժամանակ նա ծխանռնակ էր նետել ցուցարարների վրա։ Այդ ողջ ընթացքում դեպքի վայրում իրադարձություններին հետեւում էր Աշոտ Կարապետյանը։

Հուլիսի 30-ին ցույցը ցրելիս ոստիկանները ուժ էին կիրառել ցուցարարների եւ լրագրողների նկատմամբ։ Ծխանռնակի պայթյունի հետեւանքով  վնասվել էր 16-ամյա Սայադ Հարությունյանի աչքը, որը նույն օրը հեռացրել էին բժիշկները, մի շարք ցուցարարներ ու լրագրողներ ստացել էին մարմնական վնասվածքներ։