Ես կարծում եմ՝ նախկին վարչապետ Հովիկ Աբրահամյանը եւ վաղվա վարչապետը, չգիտեմ ով կլինի, կկիսեն իրենց մոտեցումները, որովհետեւ երկուսի նպատակն էլ նույնն է, որ վաղվա քաղաքացին զգա փոփոխություն սեփական մաշկի վրա: Այս մասին, այսօր՝ սեպտեմբերի 8-ին, լրագրողների հետ զրույցում նշել է ԱԺ Սոցիալական հարցերի հանձնաժողովի նախագահ, ՀՀԿ-ական Հակոբ Հակոբյանը:
Հարցին, թե Դուք ինքներդ զգացիք այդ փոփոխությունը Ձեր մաշկի վրա, նա պատասխանեց. «Ես վաղվա մասին էի խոսում, երեկվա մասին չէի խոսում»:
Իսկ փոփոխություններ տեղի ունեցա՞ն Տիգրան Սարգսյանից հետո Հովիկ Աբրահամյանի վարչապետության ընթացքում հարցին Հակոբ Հակոբյանն արձագանքեց. «Որպես Սոցիալական հարցերի հանձնաժողովի նախագահ կարող եմ ասել հետեւյալը. փոփոխությունները մարդն իր մաշկի վրա կարող է զգալ գոնե 10 տարում: Երբ ինձ հարցնում են՝ երբ կկրճատվի աղքատությունը, ես պատասխանում եմ՝ աղքատությունը երկար պետք է կրճատվի, չի վերանա: Մեր ՀՆԱ-ն եթե այսօր 11 մլրդ դոլար է, գոնե պետք է դառնա 15 մլրդ դոլար, որ մենք մեր աչքով տեսնենք աղքատության կրճատումը»:
Նա կարծիք հայտնեց, որ քաղաքական ուժերը բարոյական առումով պարտավոր են մաս կազմել նոր ձեւավորվելիք ազգային համաձայնության կառավարությանը:
Դիտարկմանը, թե ազգային համաձայնության կառավարության մասին Սերժ Սարգսյանը խոսեց «Սասնա ծռերի» գործողությունից հետո, արդյոք Սերժ Սարգսյանը կաներ այդ փոփոխությունը, եթե տեղի չունենար ՊՊԾ գնդի գրավումը, ՀՀԿ-ական պատգամավորն ասաց. «Հասարակության մեջ բեւեռացումները, կուտակվող հակասական հարաբերությունները, որոնց արդյունքում ծնվում են նոր երեւույթներ, դրանց համար ժամանակ է պետք: Իմ տրամաբանությամբ, ՊՊԾ գնդի հետ կապված «Սասնա ծռերի» գործողությունն արագացրեց այս ամեն ինչը: Եթե չլիներ նման գործողություն, միգուցե սրան գայինք 3 տարի կամ 4 տարի հետո: Սա ուղղակի, բաց արտահայտեց այն կարծիքը, որ հասարակության մեջ կուտակվել են երեւույթներ, որոնք ազգային համաձայնության խնդիր ունեն: Այստեղից նախագահի մոտ ծնվեց հայտնի ելույթը, որտեղ նա հայտարարեց, որ ազգային համաձայնության կառավարության պետք է ձեւավորվի, որպեսզի կառավարման համակարգում հասարակության բեւեռացված տարբեր շերտերի ընդգրկումով կարողանանք հանել այդ բեւեռացումը»:
Ինչ վերաբերում է Կարեն Կարապետյանին, ով ըստ լուրերի նշանակվելու է ՀՀ վարչապետ, Հակոբ Հակոբյանն ասաց. «Իմ գնահատականը չեմ ասի, հասարակության գնահատականը երեկ ստուգել եմ՝ դրական է: Երեկ ես գտնվում էին հոգեհանգստի եւ մարդկանց պարզ հարց էի տալիս՝ ստուգելու համար այն, ինչ դուք եք ուզում ստուգել, արձագանքը դրական է»:
