Լեռնային Ղարաբաղի հակամարտության կարգավորման գործընթացում առաջընթացը հայ-թուրքական հարաբերությունների կարգավորման համար առանցքային պահ կդառնա, կարծում է Ռուսաստանի ԱԳ նախարար Սերգեյ Լավրովը: Այս մասին հայտնում է «ՌԻԱ Նովոստի»-ն:
«Եթե Հայաստանը եւ Թուրքիան վերադառնան իրենց պայմանավորվածություններին առանց ղարաբաղյան հակամարտությամբ պայմանավորելու, մենք միայն ուրախ կլինենք, սակայն այնպիսի զգացողություն ունենք, որ ղարաբաղյան հակամարտության կարգավորման գործընթացում առաջընթացը կդառնա հայ-թուրքական հարաբերությունների կարգավորվման առանցքային պահը»,- լրագրողներին ասել է Լավրովը:
Նախարարը կարեւոր գործոն է համարել, որ Թուրքիան կարող է դրական դերակատարում ունենալ՝ ապահովելով «Լեռնային Ղարաբաղի, Հայաստանի ապաշրջափակումը, տարածաշրջանում նորմալ փոխգործակցությունը՝ տնտեսական, լոգիստիկական, տրանսպորտային, ենթակառուցվածքային»:
