ԵԱՀԿ ՄԽ համանախագահները տարածաշրջան կայցելեն հոկտեմբերի 3-րդ տասնօրյակին։ Այս մասին vesti.az–ին ասել է ԵԱՀԿ ՄԽ ռուսաստանցի համանախագահ Իգոր Պոպովը։

«Մենք պլանավորում ենք հոկտեմբերի 3-րդ տասնօրյակին այցելել տարածաշրջան։ Կայցելենք Ադրբեջան, Հայաստան եւ Լեռնային Ղարաբաղ։ Հանդիպումներ են նախատեսված ղեկավարության, զինվորականների հետ։  Մտադիր ենք քննարկել Վիեննայի եւ Սանկտ Պետերբուրգի պայմանավորվածությունների իրականացման ընթացքը, որոնք ուղղված են հակամարտության գոտում իրավիճակի կայունացմանը։ Կքննարկենք բանակցային գործընթացի հեռանկարները՝ հաշվի առնելով առկա աշխատանքային առաջարկները։ Կհստակեցնենք ռազմական իրադրությունը հակամարտության գոտում, որը, մեր գնահատմամբ, ապրիլյան իրադարձություններից հետո մինչեւ վերջերս հարաբերականորեն հանգիստ է»,– ասել է Պոպովը։

Անդրադառնալով անվտանգության գոտու 5 շրջանների մասին հարցին՝ Պոպովը նշեց. «Մենք բազմիցս խոսել ենք Լեռնային Ղարաբաղի շուրջ տարածքների վերադարձի մասին։ Այդ խնդիրը պետք է դիտարկել կարգավորման այլ բաղադրիչների հետ համատեղ, ներառյալ Ղարաբաղի կարգավիճակի, փախստականների վերադարձի, Լեռնային Ղարաբաղը Հայաստանին կապող միջանցքի պահպանման, խաղաղապահ գործողությունների իրականացման հարցերը։ Կարգավորման գործընթացը միասնական փաթեթ է, եւ դրանից կողմերի նախընտրած առանձին տարրերն առանձնացնելու ցանկացած փորձ ապակառուցողական է»։