Ընտրական օրենսգրքի փոփոխությունները երկրորդ ընթերցմամբ Ազգային ժողովը կընդունի վաղը՝ հոկտեմբերի 20-ին: Այս մասին այսօր՝ հոկտեմբերի 19-ին, ԱԺ արտահերթ նիստում նշեց ԱԺ փոխնախագահ Էդուարդ Շարմազանովը՝ հավելելով, որ քվեարկությունը կլինի առավոտյան ժամը 11-ին:
Նրա խոսքով, երկրորդ ընթերցմանը ներկայացված փաստաթուղթը կներառի այսօր իշխանական եւ ընդդիմադիր խմբակցությունների միջեւ ձեռքբերված համաձայնությունը, որը վերաբերում է ընտրակեղծիքի մասին սուտ մատնության առթիվ քրեական պատասխանատվությանը:
Նշենք, որ երկար քննարկումից հետո կողմերը համաձայնել են, որ ուրիշի փոխարեն քվեարկելու մասին չկանխամտածված կեղծ հայտարարությունների համար ավելի մեղմ պատիժ սահմանվի՝ կամ աշխատավարձի 200-պատիկից 800-պատիկի չափով տուգանք, կամ մինչեւ 2 տարվա ազատազրկում:
ԱԺ ոչ իշխանական խմբակցությունները օրինագծի առաջին ընթերցման ժամանակ հայտարարել էին, որ եթե այս փոփոխությունը տեղի չունենա, ապա իրենք չեն մասնակցի երկրորդ ընթերցման քվեարկությանը: Օրվա ընթացքում, սակայն, կողմերի միջեւ համաձայնությունը կայացել է: