Վրացական շուկան միշտ բաց է հայկական գյուղատնտեսական արտադրանքի համար: Այս մասին, այսօր՝ նոյեմբերի 9-ին, Հայաստանում Վրաստանի արտակարգ եւ լիազոր դեսպան Գիորգի Սագանելիձեի հետ հանդիպման ժամանակ նշել է ՀՀ գյուղատնտեսության նախարար Իգնատի Առաքելյանը:
Գյուղնախարարությունից NEWS.am-ին հայտնում են, որ ողջունելով հյուրին` նախարարը գոհունակություն է հայտնել հայ-վրացական հարաբերությունների բարձր մակարդակից եւ հույս հայտնել, որ այն կկրի շարունակական բնույթ:
«Հայաստանն ու Վրաստանը պատմական եւ աշխարհագրական առումով մշտապես սերտորեն կապված են եղել, գյուղատնտեսության ոլորտում ձեւավորվել է ամուր համագործակցություն, կազմակերպվել են գյուղատնտեսության նախարարների փոխայցեր: Սակայն երկու երկրների միջեւ գյուղատնտեսության ոլորտում առկա են լայն հնարավորություններ եւ դեռեւս չօգտագործված մեծ ներուժ, եւ հարկավոր է միջոցներ ձեռնարկել երկկողմ համագործակցությունն ավելի ակտիվացնելու ուղղությամբ», - նշել է նախարարը:
Ընդգծելով, որ վրացական շուկան միշտ բաց է հայկական գյուղատնտեսական արտադրանքի համար` դեսպան Գիորգի Սագանելիձեն վստահեցրել է, որ իր գործունեության ընթացքում կանի հնարավորը այս ոլորտում երկկողմ հարաբերությունները խորացնելու, ինչպես նաեւ հայ-վրացական գործարար կապերն ընդլայնելու ու ամրապնդելու համար:
Հանդիպման ընթացքում դեսպանը Իգնատի Առաքելյանին հրավիրել է այցելել Վրաստան` տեղում հարեւան երկրի գյուղատնտեսության բնագավառի ներկա վիճակին ծանոթանալու նպատակով: Ի պատասխան ՀՀ գյուղատնտեսության նախարարը խնդրել է դեսպանին իր վրաց գործընկերոջը փոխանցել Հայաստան այցելելու հրավերը:
