Հայաստանի նախագահ Սերժ Սարգսյանի աշխատանքային այցը Շիրակի մարզ սկսվել է Ախուրյանի շաքարի գործարան այցելությամբ:

Գործարանում մշակվում է ոչ միայն Հարավային Աֆրիկայից բերված հումքը, այլեւ Հայաստանում աճեցված շաքարի ճակնդեղը, որի մշակումից հետո արտադրվում է եվրոպական բոլոր չափորոշիչներին համապատասխան սպիտակ շաքարը: Առայժմ մշակվում է միայն ներկրված հումքը, իսկ հայրենական հումքը գործարան է հասնելու 15 օրից:

Մինչ օրս գործարանում 102 մլն դոլար է ներդրվել, տեխնիկայի մեծ մասը ներկրվել է Եվրոպայից:

Վրաստան է առաքվել 1,5 հազար տոննա շաքար, բանակցություններ են վարվում Իրանի հետ: Աշխատելով ողջ թափով՝ գործարանը կարող է արտադրել տարեկան 220 հազար տոննա, իսկ օրեկան հզորությունը ակզմում է 800 տոննա: Հայաստանի շաքարի ներքին պահանջարկը կազմում է 90 հազար տոննա:

Ներկայումս գործարանում 70 աշխատատեղ կա՝ միջինը 150 հազար դրամ աշխատավարձով: Եթե մշակումը հասնի 300 հազար տոննայի, աշխատատեղերը կավելանան մինչեւ 3000-ի: Այդ նպատակին գործարանի ղեկավարությունը մտադիր է հասնել 4-5 տարում: Ի դեպ, գործարանի սեփականատերը գործարար, պատգամավոր Սամվել Ալեքսանյանն է, ով, ի դեպ, շաքարի հիմնական ներկրողն է:

Հայաստանի նախագահը նշել է, թե տպավորված է գործարանից, որը կարեւոր նշանակություն ունի, քանի աշխատանքով է ապահովում մարդկանց: