Մենք Բաքուն գրավելու եւ կապիտուլացիա պարտադրելու ռազմաքաղաքական խնդիր չենք հետապնդում, բայց նաեւ լավ գնահատում ենք, թե ինչ անդառնալի կորուստ կարող ենք հասցնել հակառակորդին: Կարծում եմ, ավելի մանրասնելու կարիքը չկա: Այս մասին ՀՀԿ նախագահ, ՀՀ նախագահ Սերժ Սարգսյանն ասել է այսօր՝ նոյեմբերի 26–ին, Երեւանում մեկնարկած ՀՀԿ 16–րդ համագումարում։
«Ադրբեջանը շարունակում է հոխորտալ, թե փորձելու է ուժի եւ բռնության կիրառմամբ իր կամքը պարտադրել մեզ: Ապրիլին Ադրբեջանը լայնածավալ հարձակում սանձազերծեց Արցախի դեմ՝ պատերազմի հանցագործություններ կատարելով խաղաղ բնակչության եւ ռազմագերիների հանդեպ: Այդ ագրեսիան լուրջ հարված հասցրեց բանակցային գործընթացին: Այժմ հիմնախնդրի կարգավորման ջանքերը բաժանվել են ապրիլից առաջ եւ ապրիլից հետո փուլերի: Թե առաջ, թե հետո մեր դիրքորոշումը նույնն է. Հայաստանը եւ Արցախը պատերազմ սկսելու պատճառ չունեն: Սա է մեր եւ Ադրբեջանի մոտեցումների ամենաէական տարբերությունը: Խնդիրը կարող է լուծվել միայն խաղաղ բանակցությունների ճանապարհով, իսկ արդյունքի հասնելու համար անհրաժեշտ է, որ կողմերը բանակցեն բարեխղճորեն: Ոչ պակաս կարեւոր է, որ կողմերը իրատեսորեն գնահատեն ուժերի առկա հավասարակշռությունը: Ապրիլի դեպքերն ապացուցեցին, որ Բաքվում իրատեսության հետ կապված խնդիրներ կան: Փաստն այն է, որ մեր բանակը լուծեց իր առջեւ դրված խնդիրը՝ լինելով պաշտպանվող կողմ: Ադրբեջանը հանկարծակի նախահարձակ լինելով՝ իր ռազմաքաղաքական խնդիրները լուծել չկարողացավ:
ԼՂ խնդիրը կարող է լուծվել միայն Արցախի ժողովրդի ազատ ինքնորոշմամբ, մնացած բոլոր հարցերն ածանցյալ են եւ իրենց տրամաբանական լուծումը կգտնեն խնդրի լուծմանը զուգահեռ: Քանի դեռ այս հիմնական խնդիրը կա, քանի դեռ անորոշության է մատնված Արցախի կարգավիճակը, որեւէ այլ հարց լուծում չի կարող գտնել: Ադրբեջանի ղեկավարությունը շատ է սիրում բառային աճպարարություն անել. մեկ խոսում է, որ համանախագահող երկրներն իրեն ստիպում են ճանաչել ԼՂՀ անկախությունը, մեկ էլ նույնպիսի առոգանությամբ պնդում է, որ միջազգային հանրությունը լիովին կիսում է իրենց դիրքորոշումը: Համաձայնեք, սա շատ տարօրինակ հետեւողականություն է:
Մենք հստակ գնահատում ենք առկա ուժերի հավասարակշռությունը: Մենք Բաքուն գրավելու եւ կապիտուլացիա պարտադրելու ռազմաքաղաքական խնդիր չենք հետապնդում, բայց նաեւ լավ գնահատում ենք, թե ինչ անդառնալի կորուստ կարող ենք հասցնել հակառակորդին: Կարծում եմ, ավելի մանրասնելու կարիքը չկա: Մենք սպառազինությունների մրցավազքի մեջ չենք մտնելու, դրա մեջ իմաստ չենք տեսնում: Փոխարենը լավ պատկերացնում ենք մեր ԶՈՒ առջեւ դրված ռազմաքաղաքական խնդիրները, մեր ռեսուրսները լիովին բավարարում են այդ խնդիրները լուծելու համար: Որեւէ զենք ինքնին չի կարող լուծել մարտական գործողության ելքը: Մարդը, զինվորը, տակավին մնում է ԶՈՒ առանցքային միավորը: Հայկական բանակի դեմքը հայ զինվորն է, որը բազմիցս ապացուցել է, որ մարտի դաշտում որոշիչը խիզախ զենքը գործածելու կարողությունն ու մղումն է, կամքն ու խիզախությունը:
ՀՀ ԶՈՒ-ն պետք է լինի լավագույններից մեկը»,– ասել է Սերժ Սարգսյանը:
