2016թ. նոյեմբերի 30-ին Հայաստանի Հանրապետության կառավարության եւ Զարգացման ֆրանսիական գործակալության միջեւ ստորագրվել է 40 մլն եվրո արժողությամբ բյուջետային աջակցության վարկային համաձայնագիր:
Հայաստանի Հանրապետության անունից համաձայնագիրը ստորագրել է ՀՀ ֆինանսների նախարար Վարդան Արամյանը, իսկ Ֆրանսիայի Հանրապետության անունից՝ Զարգացման ֆրանսիական գործակալության տնօրենի տեղակալ Ժան Կլոդ Պիրեն եւ ՀՀ-ում Ֆրանսիայի Հանրապետության արտակարգ եւ լիազոր դեսպան Ֆրանսուա Շարպենտիեն՝ որպես համաստորագրող:
Նոր տարին նոր բնակարանում՝ սկսած 6% տարեկան տոկոսադրույքով վարկի միջոցով «Երիտասարդ ընտանիքին՝ մատչելի բնակարան» ծրագրի շրջանակներում վարկերը մինչև ս.թ. դեկտեմբերի 30-ը տրամադրվում են սկսած 6% տարեկան տոկոսադրույքով |
Վարկային համաձայնագրով նախատեսված բյուջետային աջակցության նպատակն է խթանել ՀՀ կառավարության բարեփոխումների ծրագրի՝ հարկաբյուջետային, սոցիալական, շրջակա միջավայրի կայունության եւ մրցունակության ամրապնդման ուղղություններերը:
Նման բյուջետային աջակցության վարկավորման մեխանիզմը, ի տարբերություն նպատակային ծրագրերի, հնարավորություն է ընձեռում՝ ֆինանսավորելու բյուջեի կարեւորագույն ծախսային ուղղությունները:
Ընդհանուր առմամբ, բյուջետային աջակցության վարկերն ունեն ակնհայտ առավելություններ. մասնավորապես` բյուջետային աջակցության միջոցների բաշխման եւ օգտագործման ճկունությունն ավելի մեծ է, քանի որ տվյալ պարագայում կառավարությունը գերակայությունների եւ առաջնահերթությունների վերանայման դեպքում միջոցները արագ վերաբաշխելու իրավասություն ունի: Բյուջետային վարկերը կարող են օգտագործվել այնպիսի ծրագրերի ֆինանսավորման համար, ինչպիսիք են հետգնման եկամտաբերություն չունեցող, սակայն հանրային եւ ռազմավարական կարեւոր նշանակություն ունեցող նախագծերը: Եվ վերջապես, բյուջետային աջակցության վարկերն ուղղակիորեն ստացվում են իրականացվող քաղաքականության ներքո եւ ուղղվում են պետական բյուջեի պակասուրդի ֆինանսավորմանը: Մասնավորապես, յուրաքանչյուր բյուջետային աջակցության վարկի տրամադրման համար սահմանվում են նախապայմաններ եւ միջոցառումներ, որոնց իրականացումը կառավարությունը համարում է գերակա եւ որոնք արդեն իսկ հաստատված են կառավարության կողմից ընդունված ռազմավարություններով կամ տարեկան գործողությունների ծրագրերով: