Ուզբեկստանում դեկտեմբերի 4-ին կայանալիք նախագահական ընտրությունների քվեաթերթիկներում չի լինի «բոլորին դեմ» տարբերակը, հայտնում է ՏԱՍՍ–ը՝ վկայակոչելով հանրապետության ԿԸՀ–ին։
«Ոչ, նման տող չի լինի, մեր ճանապարհն այդպիսին չէ»,– ասել է գործակալության զրուցակիցը։
Այդպիսով՝ ընտրողները պետք է նշում կատարեն առաջադրված 4 թեկնածուներից մեկի անվան դիմաց։
Ուզբեկստանի ԿԸՀ–ն գրանցել է երկրում գործող 4 կուսակցությունների 4 թեկնածուներին։ Խորհրդարանում մեծամասնություն կազմող «Գործարարների եւ գործնական մարդկանց շարժում/Լիբերալ–դեմոկրատական կուսակցություն»–ից առաջադրվել է երկրի վարչապետ, պետության ղեկավարի պաշտոնակատար Շավքաթ Միրզիեեւին։
«Միլի Թիքլանիշ» ժողովրդավարական կուսակցությունն առաջադրել է Կենտրոնական խորհրդի նախագահ Սարվար Օթամուարտովին։
Սոցիալ–դեմոկրատական «Ադոլաթ» կուսակցությունն առաջադրել է գործկոմի նախագահ Նարիմոն Ումարովին։
Ուզբեկստանի Ժողովրդա–դեմոկրատական կուսակցությունն առաջադրել է կենտրոնական խորհրդի նախագահ Խոթամժոն Քեթմոնովին։