Այսօրվա դրությամբ «Բարգավաճ Հայաստան» կուսակցությունը չի քննարկել խորհրդարանական ընտրություններին դաշինքի կազմում մասնակցելու որեւէ հարց: Այս մասին այսօր՝ դեկտեմբերի 5-ին, մամուլի ասուլիսում հայտարարեց «Բարգավաճ Հայաստան» խմբակցության քարտուղար Վահե Էնֆիաջյանը:
Նրա խոսքով՝ ԲՀԿ-ի քաղաքական թիմը քննարկել է այն հարցը, թե ինչպես առաջիկա ընտրություններին նոր որակ հաղորդի: «Այս 25 տարվա ընթացքում մեր երկրում ընտրություններից հետո պարբերաբար հասարակական դժգոհություն ենք տեսել, բողոքի զանազան զանգվածային ակցիաներ: Ներքին անվստահության այս միտմանը զուգահեռ՝ տեսել ենք միջազգային կառույցների վերաբերմունքը եւ նաեւ լսել ենք նրանց բացասական գնահատականը: Այս ամենը վերլուծելով՝ մենք կարծում ենք, որ այսօր, հատկապես ընդդիմադիր դաշտում գործունեություն իրականացնող քաղաքական ուժերի հետ միանշանակ կարող ենք ընտրությունների օրը մեկ բան գրանցել՝ 2017-ի խորհրդարանական ընտրությունները միասնական ուժերով կազմակերպել եւ իրականացնել օրենքի տառին համապատասխան»,- նշել է Էնֆիաջյանը: