ԿԳ նախարարությունն իրավական պահանջ է ամրագրել, որ բուհերի կառավարման խորհուրդների կազմում առնվազն 25 տոկոսը պետք է ուսանողներ լինեն: Այս մասին, այսօր՝ դեկտեմբերի 5-ին, ԵՊՀ-ում «Ուսանողական կառույցների ազդեցությունը եւ դերը բարձրագույն կրթական համակարգում» խորագրով ուսանողական միջազգային ֆորումի մասնակիցների հետ հանդիպման ժամանակ նշել է ՀՀ կրթության եւ գիտության նախարարի տեղակալ Կարինե Հարությունյանը:
ԿԳՆ-ից NEWS.am-ին հայտնում են, որ ֆորումն անցկացվում է երրորդ անգամ, մասնակցում են Գերմանիայի, Իտալիայի, Հունաստանի, Իսպանիայի, Լիտվայի, Ուկրաինայի, Ռուսաստանի, Չինաստանի եւ Վրաստանի ուսանողական կառույցների ղեկավարները:
Ողջունելով մասնակից ուսանողներին՝ ԿԳ նախարարի տեղակալը նշել է, որ ուրախ է ողջունել տարբեր երկրներից ժամանած երիտասարդներին, ովքեր մոտիվացված են կրթության որակի բարելավման եւ կառավարման արդյունավետության բարձրացման հարցում: Կարեւորելով ուսանողների դերակատարության բարձրացումը բուհերի կառավարման գործընթացում՝ Կ. Հարությունյանն ընդգծել է, որ ՀՀ օրենսդրությունը բուհերի կառավարման համակարգում ուսանողության մասնակցության ապահովման տեսանկյունից ազատական է. « Եվրոպական բարձրագույն կրթության տարածքում մեր երկրի օրենսդրությունն առաջադեմ է՝ օրինակ մենք իրավական պահանջ ենք ամրագրել, որ բուհերի կառավարման խորհուրդների կազմում առնվազն 25 տոկոսը պետք է ուսանողներ լինեն: Կառավարմանը մասնակցելու եւ կայացվող որոշումների վրա ազդեցություն ունենալու առումով սա բավականին լուրջ ցուցանիշ է: Բացի այդ մենք ունենք նաեւ ազգային ուսանողական կառույցներ, որոնք բավականին ակտիվ նախաձեռնություններով են հանդես գալիս»,- նշել է Կ. Հարությունյանը:
Հանդիպման ընթացքում ուսանողները տարբեր հարցեր են ուղղել նախարարի տեղակալին, որոնք վերաբերել են ուսանողների շարժունությանը, բուհերի դասավանդման մեթոդաբանությանը, կրեդիտային համակարգի արդյունավետությանը, ՀՆԱ-ի մեջ կրթության ծավալի մասնաբաժնին եւ մի շարք այլ խնդիրների: