Դեկտեմբերի 1-ից 3-ը Վարշավայում տեղի է ունեցել Եվրոպայում Դեմոկրատների եւ ազատականների դաշինք կուսակցության (ALDE) տարեկան հերթական համագումարը, որին մասնակցել է նաեւ ALDE անդամ հանդիսացող Հայ ազգային կոնգրեսի պատվիրակությունը:
ՀԱԿ-ից NEWS.am-ին հայտնում են, որ համագումարի շրջանակներում Կոնգրեսի փոխնախագահ Արամ Մանուկյանը եւ արտաքին հարաբերությունների հանձնաժողովի նախագահ Վլադիմիր Կարապետյանը մի շարք հանդիպումներ են ունեցել ինչպես ALDE կուսակցության ղեկավար կազմի, այնպես էլ եվրոպական տարբեր հաստատությունների ներկայացուցիչների հետ:
ԵԱՀԿ/ԺՀՄԻԳ տնօրեն Միքայել Լինկի հետ հանդիպման ընթացքում քննարկվել են Հայաստանի ներքաղաքական իրավիճակը, 4+4+4 բանակցությունների արդյունքում Ընտրական օրենսգրքի փոփոխությունները, մտքեր են փոխանակվել ԵԱՀԿ/ԺՀՄԻԳ-ի կողմից Հայաստանի Ազգային ժողովի ընտրություններին դիտորդական առաքելություն իրականացման հարցերի շուրջ:
ALDE կուսակցության նախագահ Հանս վան Բաալենի հետ հանդիպմանը քննարկվել են կուսակցության առաջիկա անելիքները, Հայաստանում եւ տարածաշրջանում ստեղծված իրավիճակն ու առաջիկա միջոցառումների հետ կապված հարցեր:
Կոնգրեսի ներկայացուցիչները ALDE-ի նախագահին հրավիրել են դեկտեմբերի 17-ին կայանալիք Հայ ազգային կոնգրեսի համագումարին:
ALDE փոխնախագահ, Եվրոպական խորհրդարանի պատգամավոր Իլհան Քյուչուքի հետ հանդիպման ընթացքում կարծիքներ են փոխանակվել Կոնգրես-ALDE համագործակցության, Եվրոպական խորհրդարանի կողմից Հայաստանի Ազգային ժողովի ընտրություններին ներկայացուցչական դիտորդական առաքելություն ուղարկելու հնարավորությունների վերաբերյալ:
ALDE Քաղաքական պատասխանատու Ֆիլիպ Հանսենի հետ քննարկմանը անդրադարձ է կատարվել տարածաշրջանային խնդիրներին, Հայաստանում կայանալիք առաջիկա ընտրություններին Կոնգրեսի մասնակցության հարցերին: Հանսենը ներկայացրել է ALDE կուսակցության առաջնահերթությունները եւ պատրաստակամություն հայտնել աջակցել Կոնգրեսին՝ մի շարք ծրագրերի իրականացման հարցում:
