Շնող համայնքում անհանգստացած են Թեղուտի պոչամբարի լցվելու արագ տեմպից, հաղորդում է «ԷկոԼուրը»:
«Ինչքան ես տեղյակ եմ, 50 տարով է պոչամբարի պայմանագիրը, բայց մի տարում լցվել է: Մենք հանդամասին ասում ենք բաղեր, այդ տարածքում է պոչամբարը, ահռելի պատնեշը կառուցեցին, դեռ երկու տարի չկա, պոչամբարն արդեն լցվել է: Ինչքա՞ն այդ պատնեշը պիտի բարձրացնեն… Շատ բարձր ռիսկ է դա: Մենք բնական աղետից ոչ մի անգամ ապահովագրված չենք: Երբ այստեղ, Աստված մի արասցե, խոշոր ցնցում լինի, ես ո՞նց համոզված լինեմ, որ դամբան կդիմանա: Կարող է՝ մի օր պատռվի, այս տարածաշրջանում կլինի լուրջ աղետ»,- նշել է Շնողի նախկին համայնքապետ Հովհաննես Սահակյանը:
 |
Սպառողական վարկեր առանց գրավի մինչև 2,000,000 ՀՀ դրամ Մինչև դեկտեմբերի 30-ը «Մինչև 2,000,000 ՀՀ դրամ առանց գրավի սպառողական վարկերը» տրամադրվում են ավելի ցածր՝ ընդամենը 19-21% տարեկան տոկոսադրույքով: |
«Այդ պոչամբարն արագ բարձրանում է լեռնային գետի հունում: 10 օրվա մեջ այնքան է առաջ գնացած լինում, որ տեսողականով երեւում է: Որ մի շատ լավ անձրեւառատ տարի լինի, այդ ամբողջ պոչանքը բերելու է, լցնելու գյուղի մեջ»,- ասաց Շնողի բնակիչ Լեւոն Ալիխանյանը:
ԷկոԼուրի հարցին, թե որն է պոչամբարի արագ բարձրանալու պատճառը, բնակիչներն ասացին, որ, իրենց հասած լուրերի համաձայն, հանքաքարում օգտակար հանածոներն ավելի քիչ են, քան հաշվարկվել էր նախագծով, այդ պատճառով թափոններն ավելի շատ են:
Թեղուտի պոչամբարի արագ լցվելու մասին նշված է նաեւ Համաշխարհային բանկի հանձնարարությամբ պատրաստված «Հանքարդյունաբերության ոլորտի կայունության ռազմավարական գնահատում. Հայաստան» զեկույցում: Ըստ զեկույցի՝ սեյսմիկ գոտում գտնվող պոչամբարը միջազգայնորեն ընդունված բարձրացման արագությունից ավելի արագ է բարձրանում, ինչը պոչամբարի պատնեշի պատի անկայունության պատճառներից է: Զեկույցում նաեւ նշված է. «Թեղուտի պոչամբարի ներկայիս նախագիծը միջազգային չափանիշների համեմատությամբ անընդունելի է ֆիզիկական անկայունության առումով: … Այն համարժեք չէ թե՛ բնապահպանական, թե՛ ֆիզիկական կայունության առումով… հարկավոր էր լուծել վտանգված բնակչության եւ կյանքի կորստի պոտենցիալ խնդիրները, հատկապես՝ Շնող համայնքի դեպքում, որը գտնվում է փլուզման սցենարի ստորին գոտում»:
Զեկույցի վերաբերյալ ԷկոԼուրի հարցմանն ի պատասխան Թեղուտի պղնձամոլիբդենային հանքավայրը շահագործող «Վալլեքս» խմբի ըներության տեղեկատվության եւ հասարակայնության հետ կապերի բաժին տեղեկացրեց. «Թեղուտ» ՓԲԸ պոչամբարը նախագծվել է «Վալլեքս» խմբի ընկերությունների «Լեռնամետալուրգիայի ինստիտուտ» ՓԲԸ կողմից եւ համապատասխանում է ՀՀ գործող շինարարական եւ սեյսմիկ նորմատիվ փաստաթղթերի պահանջներին: Ինչ վերաբերում է դրա կայունությանը, ապա դեռեւս 2015թ. հուլիսին այդ հարցը քննարկվել է Եվրոպական բանկի մասնագետների մասնակցությամբ եւ ձեռք է բերվել համաձայնություն/կայացվել է որոշում՝ շարունակել պոչամբարի շահագործումը՝ այդ ընթացքում կատարելով մոնիթորինգ:
Պոչամբարի հետ կապված մյուս խնդիրն էլ Շնող գետի աղտոտումն է, ինչի վերաբերյալ «Վալլեքս»-ը պատասխանել է. «Շնող գետի աղտոտումը պայմանավորված էր 2016թ. հունվար-փետրվարին առատ տեղումներով եւ արագ ձնհալով, ինչի արդյունքում ավելի խոշոր վթարից խուսափելու նպատակով Ընկերությունն ստիպված էր պարզեցման ավազանից կատարել ջրի կառավարելի բացթողումներ: Հետագայում նմանատիպ իրավիճակներից խուսափելու համար շրջանառու ջրի պոմպակայանում պոմպերի թիվն ավելացվել է թվով մեկ ստացիոնար եւ մեկ պահեստային պոմպերով»:
Այս պատասխանից հետո էլ շնողցիները շարունակում են բողոքել գետի աղտոտվածությունից: «Գետը գնալով ավելի է աղտոտվում: Փաստացի գիշերները բաց են թողնում պոչամբարը: Եթե իրենք մաքրման կետ չունեն, ինչպե՞ս են մաքրելու: Երկու հատ ցուցադրական բասեին են սարքել, հենց դուք Երեւանից դուրս եք գալիս, այդ բասեինի մեջ լցնում են, լցվում է, ու դրանից հետո էլի նույն վիճակը: Գյուղի մի հատվածը Շնող գետի ջրից են օգտվում, փաստացի ջրազրկված են մարդիկ… Տնտեսական վնաս են կրում մարդիկ: Մեկը ես, որ հեկտարներով տարածք ունեմ պոչամբարի ներքեւը, չեմ ջրում, մի երկու ծառ եմ ջրում գյուղի խմելու ջրով: Այսինքն, ջրազրկված ենք»,- ասաց Լեւոն Ալիխանյանը:
Թեղուտի պոչամբարը գտնվում է Խառատանոց գետի կիրճում: Ընդգրկում է շուրջ 110 հա տարածք: Թեղուտի պնձամոլիբդենային հանքավայրի ՇՄԱԳ-ի համաձայն՝ պոչամբարը նախատեսված է 173,6 միլիոն խմ պոչանքի համար, որոնք կկուտակվեն 28 տարվա ընթացքում տարեկան 7 միլիոն տոննա արտադրողականության դեպքում:
